შინაგან საქმეთა სამინისტრო განცხადებას ავრცელებს

სამართალი - 21:09, 10 Jan, 2013

621

განცხადების ტექსტს "ნიუპოსტი" უცვლელად გთავაზობთ.

"ვანის პოლიციის უფროსის ყოფილი მოადგილის ლევან მიგინეიშვილსა და მოქალაქე ალეკო ქავთარაძეს შორის მომხდარ ინციდენტთან დაკავშირებით, შინაგან საქმეთა სამინისტრომ ცნობა იმავე დღეს, 2012 წლის 8 დეკემბერს მიიღო. ამ დროისათვის ლევან მიგინეიშვილს საკუთარი პატაკის საფუძველზე დატოვებული ჰქონდა თანამდებობა. 9 დეკემბერს სამტრედიის რაიონულ პროკურატურაში დაიწყო გამოძიება. მოქალაქე ალეკო ქავთარაძე ლევან მიგინეიშვილთან და პოლიციელებთან მომხდარ ინციდენტს საერთოდ ურყოფს", - ნათქვამია განცხადებაში.

შეგახსენებთ, რომ საპარლამენტო უმცირესობის წევრი ირმა ნადირაშვილი მოითხოვს, დაისაჯონ პოლიციელები, რომლებიც 37 წლის ალეკო ქავთარაძის დახვრეტის მცდელობაში მონაწილეობდნენ.

ამის შესახებ ნადირაშვილმა გაზეთ "პრაიმ-ტაიმის" პრეს-კლუბში გაკეთებულ პრესკონფერენციაზე განაცხადა და ერთი თვის წინ ვანის რაიონში მომხდარი ინციდენტის შესახებ ინფორმაცია გააჟღერა.

"საქმე ეხება, ვანის პოლიციაში მომხდარ დანაშაულს, რომელიც პოლიციელებმა ჩაიდინეს. 37 წლის ალეკო ქავთარაძე ვანის პოლიცის უფროსის მოადგილემ ლევან გეგენაშვილმა დაიბარა დაკითხვაზე, ყოველგვარი სტატუსის გარეშე 8 საათის განმავლობაში ცდილობდნენ მისგან მიეღოთ ინფორმაცია ერთ-ერთ ადამიანზე. მასზე მიმდინარეობდა ფსიქოლოგიური ზეწოლა, ამ გზით ჩვენების მიღება ვერ მოახერხეს, შედეგ ვანის პოლიციის უფროსის მოადგილემ ორ თანამშრომელთან ერთად ქავთარაძე პოლიციის მანქანაში ჩასვეს და ტყეში წაიყვანეს, სადაც ცეცხლსასროლი იარაღით ფეხში დაჭრეს. შემდეგ უნდოდათ დანაშაულის მიჩქმალვა, ამიტომ ერთ-ერთ კერძო ექიმთან სახლში გადაიყვანეს. ექიმმა განაცხადა, რომ დახმარებას ვერ აღმოუჩენდა, შემდეგ უკვე გადაიყვანეს ქუთაისის ავტოქარხნის საავადმყოფოში, საიდანაც ექიმმა ფუტკარაძემ პოლიციის განყოფილებაში გაგზავნა შეტყობინება ქავთარაძის დაჭრის შესახებ. აღნიშნულის შესახებ უკვე ცნობილია შს მინისტრისთვის, გენპროკურორისთვის, ასევე იუსტიციის მინისტრისთვის, ეს არის ადამიანის დახვრეტის მცდელობა", - განაცხადა ნადირაშვილმა და დასძინა, რომ მოსწონს თუ არა თეა წულუკიანს და მის მამას, რომ საქართველოში დახვრეტა გაუქმებულია, ეს მუხლი აღარ არსებობს.

ნადირაშვილის თქმით, ის ითხოვს, რომ სამართალდამცველებმა დანაშაულში მონაწილე ადამიანები დააპატიმრონ და საქმეზე გამოძიება დაიწყოს.

ნადარეიშვილი მიიჩნევს, რომ მომხდარით პარლამენტიც უნდა დაინტერესდეს.