საფრანგეთში, ზღვაში მეორე მისტრალი ჩაუშვეს. ამის შესახებ რუსული მედია იტყობინება.

ჯერჯერობით გაურკვეველია, გადასცემს თუ არა საფრანგეთი რუსეთს სამხედო გემებს.

კონტრაქტით აღებული ვალდებულების შესრულება 14 ნოემბრისთვის იგეგმებოდა, თუმცა "მისტრალები" რუსულ მხარეს ჯერ კიდევ არ მიუღია.

ამ დროისათვის პორტ სენ-ნაზერში 500-მდე რუსი მეზღვაური იმყოფება, რომლებიც ოფიციალური პარიზის გადაწყვეტილებას ელოდებიან.

საფრანგეთის ხელისუფლებამ პორტში მყოფ 400 რუს მეზღვაურს გადაადგილება შეუზღუდა. გაზეთ „ფიგაროს“ ცნობით რამდენიმე დღის წინ საფრანგეთის ხელისუფლებაში გაჩნდა შიში იმის შესახებ, რომ რუსებმა შესაძლოა მისტრალი გაიტაცონ.

გადაადგილების შეზღუდვის მიზეზი ვერტმფრენმზიდზე მომხდარი ინციდენტი გახდა.რუსი მეზღვაურები, რომლებიც მისტრალზე წვრთნას გადიან , შეეცადნენ თავიანთი ნივთების ბორტზე ატანას, თუმცა მათი შეჩერება მოხერხდა.

„ფიგაროს“ წყაროს ინფორმაციით თუ რუსები ამ ნაბიჯით მისტრალს დაეუფლებოდნენ და კონტროლს დაამყარებდნენ, მათი იქედან გამოძევება გაძნელდებოდა ალბათ ეს იქნებოდა იმის სიგნალი, რომ მისტრალი გეზს რუსეთისკენ აიღებდა.

მისტრალთან დაკავშირებით საფრანგეთის პოლიტიკურ წრეებში აზრთა სხვადასხვაობაა, საფრანგეთის ყოფილი პრეზიდენტის ნიკოლა სარკოზის განცხადებით, საფრანგეთმა თავის სიტყვას პატივი უნდა სცეს და რუსეთს მისტრალი გადასცეს.

იმ შემთხვევაში, თუ საფრანგეთი რუსეთს "მისტრალებს" არ გადასცემს, მოსკოვი პარიზის წინააღმდეგ საერთაშორისო სასამართლოში სარჩელის შეტანას აპირებს.