პუტინი რუსეთში მოსალოდნელი ფერადი რევოლუციის აღსაკვეთად ემზადება

მსოფლიო - 22:21, 20 Nov, 2014

2421

რუსეთის პრეზიდენტმა უშიშოების საბჭოზე განაცხადა, რომ ხელისუფლება მიმართავს ყველა შესაძლო ზომებს, რათა არ დაუშვას ქვეყანაში ფერადი რევოლუციების მსგავსი მოვლენების განვითარება.

,,ჩვენ ვხედავთ თუ რა ტრაგიკული შედეგები მოიტანა ე.წ. ფერადი რევოლუციების ტალღამ და ჩვენ გავაკეთებთ ყველაფერს, რომ ასეთი რამ არასოდეს მოხდეს რუსეთში", - აღნიშნა ვლადიმერ პუტინმა უშიშროების საბჭოს სხდომაზე გამოსვლისას, სადაც განიხილებოდა სახელმწიფო კონცეფცია ექსტრემიზმთან საბრძოლველად.

პრეზიდენტმა აგრეთვე ფერადი რევოლუციები გააიგივა ექსტრემიზმთან, რომელიც, მისი სიტყვებით, გამოიყენება თანამედროვე მსოფლიოში, როგორც ინსტრუმენტი გეოპოლიტიკისა და გავლენის სფეროების შეცვლისთვის.

,,ჩვენ თანმიმდევრულად, ღრმად და დაჟინებით უნდა დავკავდეთ ექსტრემიზმის პროფილაქტიკით, რათა აღმოვფხვრათ მისი ნაადრევი გამოვლინებები", - ხაზი გაუსვა პუტინმა. კერძოდ, მან მოუწოდა გაძლიერდეს კონტროლი თუ რამდენად დაცულია წესები მიგრანტების შესახებ, რადგან უკანონო მიგრაცია, მისი აზრით, არის წყარო დანაშაულების ზრდის, ეთნიკური შუღლის გაღვივებისა და ექსტრემიზმის გამოვლინების.

რუსეთის ლიდერმა აგრეთვე განაცხადა, რომ ის შეწუხებულია ინტერნეტში ანტისახელმწიფოებრივი პროპაგანდის ზრდით. რუსული კანონმდებლობა, რომელიც მიმართულია ექსტრემიზმთან საბრძოლველად, მუდმივად ხდება საერთაშორისო ორგანიზაციების კრიტიკის საგანი, კერძოდ, ექსპერტები თვლიან, რომ ისინი ზღუდავენ რუსეთის საინფორმაციო საშუალებების თავისუფლებას.

ბოლო დროს, გაფრთხილება ექსტრემიზმის შესახებ წესების დარღვევაზე, მიიღო რადიოსადგურ ,,ეხო მოსკვიმ" და ოპოზიციურმა გამოცემა ,,ნოვაია გაზეტამ". ოთხშაბათს, პირველად რუსეთის სისხლის სამართლის პრაქტიკაში, სასამართლომ ექსტრემიტულად ცნო ანეკდოტი.