გერმანიის საგარეო საქმეთა მინისტრის ფრანკ ვალტერ შტაინმაიერის აზრით, უკრაინის კრიზისის მოგვარებასთან დაკავშირებით ოპტიმიზმის საფუძველი არ არსებობს, რადგან მინისკის შეთანხმებები არ სრულდება.

„ამ სიტუაციაში ოპტიმიზმის საფუძველი არ არსებობს“- განაცხადა მან რუსეთის საგარეო უწყების ხელმძღვანელთან მოლაპარაკებების შემდეგ გამართულ პრეს-კონფერენციაზე.

შტაინმაიერმა ხაზი გაუსვა იმას, რომ კრიზისის სამხედრო ძალით მოგვარება შეუძლებელია და მოლაპარაკება რჩება კონფლიქტის მოგვარების ერთადერთ საშუალებად.

„მე აქ ჩამოვედი იმისთვის რომ გამოვხატო ჩვენი მოლოდინები, ჩვენი რწმენა, რომ რუსეთი დაგვეხმარება დავძლიოთ არსებული მწვავე სიტუაცია და თავიდან ავიცილოთ უფრო მეტი ესკალაციის საფრთხე“- განაცხადა მინისტრმა.

თავის მხრივ სერგეი ლავროვმა, მოუწოდა შტაინმაიერს არ დაადანაშაულონ რუსეთი მინსკის შეთანხმების არშესრულებაში, ამასთანავე რუსეთის საგარეო უწყების მეთაურმა განაცხადა რომ კიევმა უნდა დაიწყოს პირდაპირი დიალოგი არაღიარებულ რესპუბლიკებთან.

სერგეი ლავროვი და ფრანკ ვალტერ შტაინმაიერი შეთანხმდნენ, რომ ამ ეტაპზე უმთავრესი ამოცანა, დაპირისპირებული მხარეების ერთმანეთისაგან დაშორებაა.