80-წლის სერიულ მკვლელ ჩარლზ მენსონს, რომელსაც სამუდამო პატიმრობა აქვს მისჯილი, დაქორწინების უფლება მისცეს, მისი რჩეული 26 წლის ეფტონ ილეინ ბერტონია.

მენსონის მომავალი მეუღლე 9 წლის წინ საცხოვრებლად იმ ქალაქში გადავიდა, სადაც მენსონი იხდის სასჯელს , რათა თავის რჩეულთან უფრო ახლოს ყოფილიყო.

მენსონი გასამართლებული იქნა 7 ადამიანის, მათ შორის რეჟისორ რომან პოლანსკის ორსული მეუღლის - კინომსახიობ შერონ ტეიტის და მისი დაუბადებელი შვილის მკვლელობისთვის. დანაშაული ლოს ანჯელესში 1969 წელს მოხდა.

ეფტონ ილეინ ბერტონმა, რომელიც თავისთავს ვარსკვლავს (Star) უწოდებს, მედიის წარმომადგენლებთან განაცხადა, რომ საქორწინო ცერემონია მომავალ თვეში შედგება.

სისხლიანი სექტის „მენსონის ოჯახის“ ლიდერმა და მისმა მიმდევრებმა 1969 წელს მკვლელობების სერია ჩაატარეს, რომელიც მხეცური სისასტიკით გამოირჩეოდა.

თავად მენსონს და მის სამ თანამზრახველს სიკვდილით დასჯა მიუსაჯეს, თუმცა 1972 წელს ეს სასჯელის ზომა სამუდამო პატიმრობით შეუცვალეს.