კონტროლის პალატამ ,,ნაცმოძრაობის" მასალების შემოწმება დაიწყო

სამართალი - 17:37, 09 Jan, 2013

522

,,ნიუპოსტი"" აუდიტის სამსახურის განცხადებას უცვლელად გთავაზობთ:

"2013 წლის 8 იანვარს სახელმწიფო აუდიტის სამსახურში საქართველოს მთავარი პროკურატურიდან შესწავლისა და შემდგომი რეაგირების მიზნით, გადმოიგზავნა სისხლის სამართლის საქმის მასალის ასლები, რომლებიც შესაძლოა, პოლიტიკური გაერთიანება "ერთიანი ნაციონალური მოძრაობის" მიერ ორგანული კანონით განსაზღვრული ვალდებულებების დარღვევის ფაქტებს შეიცავდეს.

პოლიტიკური პარტიების ფინანსური მონიტორინგის სამსახურმა "მოქალაქეთა პოლიტიკური გაერთიანებების შესახებ" საქართველოს ორგანული კანონით მონიჭებული უფლებამოსილების ფარგლებში, საქართველოს მთავარი პროკურატურიდან მიღებული მასალების საფუძველზე ადმინიტრაციული წარმოება დაიწყო, რომლის ფარგლებშიც პოლიტიკური დაფინანსების კანონშესაბამისობის საკითხის დადგენის უზრუნველსაყოფად კანონით განსაზღვრული ყველა ღონისძიება გატარდება. მათ შორის, იმ პირთა მოწმის სახით გამოკითხვა მოხდება, რომლებიც შესაძლოა, საქმის ფაქტობრივი გარემოებების თაობაზე ინფორმაციას ფლობდნენ. სახელმწიფო აუდიტის სამსახური, პოლიტიკური დაფინანსების გამჭვირვალობის უზრუნველყოფის მიზნით, გატარებული ღონისძიებებისა და მიღებული გადაწყვეტილების შესახებ ინფორმაციას საჯაროს გახდის და მათი გაცნობის საშუალება საზოგადოების ყველა დაინტერესებულ წევრს მიეცემა", - ნათქვამია სახელმწიფო აუდიტის სამსახურის მიერ გავრცელებულ განცხადებაში.