რუსეთის პრეზიდენტის, ვლადიმირ პუტინის განცხადებით, ევროკავშირის, აშშ-ისა და სხვა ქვეყნების მიერ უკრაინის კრიზისის გამო რუსეთისთვის დაწესებული სანქციები ეწინააღმდეგება დიდი ოცეულის პრინციპებს და საერთაშორისო კანონს.

პუტინმა სააგენტო „ტასს“ 14 ნოემბერს გამოქვეყნებულ ინტერვიუში უთხრა, რომ ქონების გაყინვა, ვიზების გაცემის აკრძალვა და რუსეთის კომპანიებისთვის დასავლეთის ფინანსურ ბაზრებზე შესაღწევად ბარიერების შემოღება მხოლოდ გაეროსა და მისი უშიშროების საბჭოს უფლებამოსილება შეიძლება იყოს.

პუტინმა აღიარა, რომ სანქციებმა და ნავთობის ფასის კლებამ რუსეთის ეკონომიკას ზიანი მიაყენა, თუმცა განაცხადა, რომ კრემლს საკმარისი ფულადი რეზერვები აქვს საიმისოდ, რომ ნებისმიერ ეკონომიკურ კრიზისს გაუმკლავდეს და სოციალური ვალდებულებები შეასრულოს.

ამასთან, პუტინმა არ გამორიცხა შესაძლებლობა, რომ მთავრობამ თავისი რეზერვების ნაწილი გამოიყენოს იმისათვის, რომ დაეხმაროს სახელმწიფო ნავთობგიგანტ „როსნეფტს“, რომელსაც საერთაშორისო სანქციებმა ზარალიმიაყენა.

პუტინის თქმით, რუსეთს სურს თავი დააღწიოს ნავთობის საერთაშორისო ბაზრებზე არსებულ „დოლარის დიქტატურას“ და ენერგეტიკის სფეროში გადარიცხვებისას გამოიყენოს როგორც რუბლი, ისე ჩინური იუანი.