ჯარისკაცების მოაწმვლის საქმეზე დაკავებულ თავდაცვის სამინისტროს მაღალჩინოსნებს აღკვეთის ღონისძიების სახით არც ერთი ფორმა არ განესაზღვრათ.

მოსამართლე შორენა გუნცაძემ პროკურატურის შუამდგომლობა ბრალდებულებისთვის აღკვეთის ღონისძიების სახით გორაოს შეფარდებასთან დაკავშირებით არ დააკმაყოფილა.

დღევანდელ პროცესზე სიტყვით გამოვიდნენ ბრალდებულები. მათი თქმით, ისინი უდანაშაულები არიან და საკუთარ სიმართლეს დაამტკიცებენ.

„ის ბრალდება, რომელიც 4 ნოემბერს მე წამიყენეს მოულოდნელი იყო“, - განაცხადა პროცესის დასრულების შემდეგ გენერალური შტაბის სამედიცინო დეპარტამენტის ყოფილმა უფროსმა მედეა ბეთაშვილმა.

ადვოკატის შეფასებით სასამართლომ კანონიერი გადაწყვეტილება მიიღო.

„სასამართლომ აწონ-დაწონა ბრალდებისა და დაცვის მიერ წარმოდგენილი არგუმენტები და მიიჩნია, რომ დაცვის არგუმენტები უფრო წონადი იყო, ვიდრე ბრალდების. ამიტომ მიიღო კანონიერი გადაწყვეტილება“, - განაცხადა ბრალდებულების ადვოკატმა ნოდარ თოფურიძემ.

ბრალდების მხარე ხუთი დაკავებულის მიმართ გირაოს სახით 10 000 ლარის დაკისრებას ითხოვდა, ხოლო ერთისთვის 2000 ლარის დაკისრებას.

აღნიშნულ საქმეზე წინასასამართლო სხდომა 24 დეკემბერს ჩაინიშნა. შეგახსენებთ, რომ საქმე თავდაცვის სამინისტროს ყოფილ მაღალჩინოსნებს ბრალად სამსახურეობრივი გულგრილობა ედებათ ბრალად. 6 ბრალდებულიდან 3 ქართული კვების თანამშრომელია.