დეპუტატ ვალერი გელაშვილის განცხადებით, 2005 წელს, მასზე მომხდარი შეიარაღებული თავდახსმისა და ცემის საქმეში, შინაგან საქმეთა სამინისტროს მაღალჩინოსნები იყვნენ ჩართული.

ვალერი გელაშვილმა ტელეკომპანია „იმედთან“ სატელეფონო კომენტარისას განაცხადა რომ მისი ცემის შემდეგ ექსპერტიზამ საქართველოში ნაკლებად მძიმე დაზიანება დაუდგინა, და ის იძულებული გახდა ექსპერტიზა ლიტვაში ჩაეტარებინა.

„სიმართლე უნდა დადგენილიყო. სიკვდილის პირამდე ვიყავი მიყვანილი და საქართველოს ექსპერტიზამ ნაკლებად მძიმე დაზიანება დამიწერა. ასე რომ, იძულებული ვიყავი, ლიტვაში ექსპერტიზა გამეკეთებინა, რის შემდეგაც, ერთობლივი ექსპერტიზის ჩატარება მოხდა, რომლის თანახმადაც, სხეულის მძიმე დაზიანება დადგინდა“, - განაცხადა ვალერი გელაშვილმა.

პარლამენტის წევრ ვალერი გელაშვილზე 2005 წელს მომხდარი შეიარაღებული თავდასხმის და მისი ცემის საქმეზე, საქართველოს ყოფილ პრეზიდენტს, მიხეილ სააკაშვილს, შინაგან საქმეთა ყოფილ მინისტრს ივანე მერაბიშვილს, სპეციალური ოპერატიული დეპარტამენტის ყოფილს უფროსს ერეკლე კოდუას და ამავე დეპარტამენტის სამმართველოს ყოფილ უფროსს გია სირაძეს ბრალდებები დაუმძიმდათ.

პროკურატურის ინფორმაციით, მიმდინარე გამოძიების ფარგლებში, სასამართლო-სამედიცინო ექსპერტიზის პირველადი დასკვნით, ვალერი გელაშვილს დადგენილი ჰქონდა ჯანმრთელობის ნაკლებად მძიმე დაზიანება. დაზარალებულის მიერ ლიტვაში ჩატარებული ალტერნატიული სასამართლო-სამედიცინო ექსპერტიზის დასკვნით და შემდგომში, ლიტველი და ქართველი ექსპერტების ერთობლივი კომისიური საექსპერტო კვლევის შედეგად, ვალერი გელაშვილს სიცოცხლისთვის სახიფათო სხეულის მძიმე ხარისხის დაზიანება დაუდგინდა.