საქალაქო სასამართლოში პროცესზე ზურაბ ჟვანიასთან ერთად გარდაცვლილი რაულ უსუპოვის ახლობლები და ასევე სოფელ ყარაჯალას რამდენიმე მოლა დაიკითხა, რომლებმაც მუსლიმური წესის მიხედვით, გარდაცვლილი უსუპოვი განბანეს. მათი თქმით, უსუპოვის ცხედარს, გულმკერდის არეში ორი ნახვრეტი აღენიშნებოდა. დაზიანებები კი მათ სამედიცინო დახმარების შედეგად მიყენებული ეგონათ.

აღნიშნული ჩვენების შემდეგ, პროკურატურის მოთხოვნით, ჩვენების მიცემა მოწმემ ვიდეოფირის ჩვენების თანხლებით განაგრძო. მოსამართლემ კი პროცესის ეს ნაწილი დახურა. ვიდეოფირის ჩვენების შემდეგ, პროცესი დამსწრეთათვის კვლავ საჯარო გახდა.

საქმის პროკურორის რევაზ ნადოის თქმით მოწმეები ადასტურებენ, რომ გარდაცვლილს გულმკერდის ზედაპირზე ორივე მხარეს დაზიანებები აღენიშნებოდა ნაჩხვლეტების სახით.

საპირისპიროს აცხადებს ბრალდებულის ადვოკატი ზურაბ ტაბიძე, რომელიც აცხადებს, რომ საქმეში არსებული ვიდეო და ფოტომასალა არ აღწერს აღნიშნულ დაზიანებებს, რომლებზეც მოწმეები საუბრობენ. აღნიშნული ვიდეომასალა დღევანდელ პროცესზე დახურული სხდომის რეჟიმში წარადგინეს. უსუპოვის მამამ, იაშა უსუპოვი უბედურ შემთხვევას გამორიცხავს და აცხადებს, რომ მისი შვილი და ზურაბ ჟვანია მოკლეს. მისი თქმით ნაჩხვლეტები, როემლიც მის შვილს განბანის დროს აღმოუჩინეს ცხადყოფს რომ რაულ უსუპოვის სხეულში შხამი შეიყვანეს და ისე მოკლეს, იაშა უსუპუპოვის დაკითხვის შემდეგ, მას ლევან ჩაჩუამ მიმართა "ჩემს მტერს ის უბედურება, რაც თქვენ დაგემართათ. გულწრფელად გისამძიმრებთ. ჩემი პროფესიის ფარგლებში ხშირად მხვდებოდნენ თქვენს მდგომარეობაში მყოფი ადამიანები და უმრავლეს შემთხვევაში ვაკმაყოფილებდი მათ ინტერესებს. როდესაც სასამართლო ჩემი დაკითხვის ეტაპზე გადავა, თქვენ შეგიძლიათ დამისვათ ნებისმიერ შეკითხვა და თუ ამის საშუალება მაინც არ გექნებათ, როდესაც გამოვალ ციხიდან, თუ ცოცხალი ვიქნები, შემიძლია შეგხვდეთ და ნებისმიერ თქვენს შეკითხვას ვუპასუხო. გეტყვით სიმართლეს, გინდათ ჩემს ქრისტესთან დავიფიცებ, გინდათ - თქვენს ალაჰთან", - განაცხადა ლევან ჩაჩუამ.

გარდაცვლილის მამამ ექსპერტის მისამართით კიდევ ერთი შეკითხვა დასვა - თუკი სოფლის მოლებმა, რომლებმაც გარდაცვალების მეორე დღეს განბანეს მიცვალებული და შეამჩნიეს მკერდის არეში დაზიანებები, რატომ ვერ შეამჩნია ეს ექსპერტმა.

ამის შემდეგ დაცვის მხარემ გარდაცვლილის მამას ჰკითხა, რა აძლევს მას იმის თქმის საფუძველს, რომ მისი შვილი არის მოკლული. საპასუხოდ იაშა უსუპოვმა განაცხადა, რომ მისი შვილი, რომელიც სისუფთავით გამოირჩეოდა, პრემიერთან გასვრილი ტანსაცმლით არ წავიდოდა. იაშა უსუპოვის თქმით, ტანსაცმელი, რომელიც მის შვილს გარდაცვალების მომენტში ეცვა, ტალახით იყო დასვრილი. ამასთან, როგორც მან აღნიშნა, აქვს სხვა არგუმენტებიც, რომლის საფუძველზეც ფიქრობს, რომ მისი შვილი მოკლულია და უბედური შემთხვევა არ არსებობს.