სენსაციური რეცეპტები - ლიმონის მურაბა!!!

საზოგადოება - 16:14, 08 Jan, 2013

6205

ვაკეში, კავსაძის ქუჩის კუთხეში გვიან ღამით ერთი მოხუცი ქალი დგას ხოლმე და 1 პარკ ლიმონს 1 ლარად ყიდის... ღამე, სიცივე, ახალი წლის დღეები და ფიქრი მოხუც შეციებულ ქალზე ამ ყველაფერს უფრო ჯადოსნურს ხდის...

გადავყოფ მარცხენა ხელს თბილი მანქანიდან, ვყიდულობ ლიმონით სავსე პარკებს და ქალის ლოცვა მომყვება სახლამედე... რამდენჯერ მიფიქრია - ნეტავ მანქანაში მქონდეს (ან ქუჩაში იდგეს) ცხელი ჩაის აპარატები და ასეთ მოხუცებს ზამთრისგან გადავარჩენ;))) გავუწოდებ ფულს და ცხელ ჩაის... ის მომაწოდებს ლიმნიან პარკებს....

ასე სევდიანად დავიწყე რეცეპტი, რომელიც ჩვენი ჯანმრთელობის უებარი წამალია... გრიპის, ვირუსის, გარესამყაროს ავი ზრახვების წინააღმდეგ - ცხელი ჩაი და ლიმონის მურაბა!!!

ლიმონის მურაბა

მასალა: 1 კგ ლიმონი, თხელკანიანი, 2 კგ შაქარი, 1 ჭ წყალი.

პროცესი: ლიმონს დანით გავაცალოთ კანი, ისევე როგორც ფორთოხალს ვაცლით. ფრთხილად დავყოთ ლებნებად . დავასხათ მდუღარე წყალი, გავაჩეროთ ნახევარი საათით, შემდეგ გადავწუროთ და უცებვე ცივ გამდინარე წყლში ჩავდგათ 4–5 წუთით. ესეც გადავწუროთ.

ლიმონის მურაბა იხარშება დაბალ ცეცხლზე , ქვაბს ქვემოთ აუცილებლად უნდა დავდოთ ცეცხლის გამანაწილებელი.

ჯერ იხარშება სიროფი - 2 კგ შაქრისა და 1 ჭ წყლისაგან, ცხელ სიროფში ფრთხილად ჩავყაროთ ლებნები და წამოდუღებიდან 5 წუთი იდუღოს.

მერე გავთიშოთ ცეცხლი და მთელი ღამე დავტოვოთ. დილით ისევ შევდგათ ცეცხლზე გამზადებამდე. ცხელი ჩავასხათ ქილებში.

პ.ს. დიდი მადლობა რეცეპტების მოწოდებისთვის ლეილა ნაროუშვილს...

გაფრთხილებთ - ეს მურაბა არის მაინც მჟავე და 1 კოვზი 1 ლებნით საკმარისია დიდ ჭიქა ცხელ ჩაიში;))) ანუ ჟოლოს მურაბასავით 1 ტონას ვერ გეახლებით;))) უბრალოდ, ჩათვალეთ, წამალია - გრიპის წინააღმდეგ...

ესმა