ცნობამ რუსული შეიარაღებული ძალების და ტექნიკის უკრაინის ტერიტორიაზე გადაადგილების შესახებ ფაქტიურად „დამარხა“ მინსკში მიღწეული შეთანხმება- ამის შესახებ აშშ-ს სენატორმა მაკკეინმა განაცხადა.

„რუსეთმა დაარღვია ცეცხლის შეწყვეტის შესახებ შეთანხმება და ისევ აწვდის პრორუს სეპარატისტებს სამხედრო ტექნიკას და შეიარაღებას. შეტყობინება რუსული ტანკების, არტილერიის და სამხედრო პერსონალის აღმოსავლეთ უკრაინაში დაბრუნების შესახებ ჩვენთვის სიურპრიზი არ ყოფილა“- აღნიშნა ჯონ მაკკეინმა.

„თუ ეს მართალია, ეს იქნება უკანასკნელი და ყველაზე დამაჯერებელი მიზეზი იმისა, რომ ცეცხლის შეწყვეტის შესახებ შეთანხმება მკვდრად ჩავთვალოთ, ეს ინფორმაცია თუ დადასტურდა , ამან უნდა გამოიწვიოს აშშ-ს და ევროკავშირის სანქციების გამწვავება."

მაკკეინის თქმით, აშშ-მ უკრაინას სამხედრო დახმარება უნდა გაუწიოს, რათა ქვეყანამ პუტინის აგრესიისგან ქვეყნის სუვერენიტეტის დაცვა შეძლოს.

სენატორის აზრით „თუ აშშ ამას არ გააკეთებს, პუტინი გააგრძელებს უკრაინის ტერიტორიების ჩაყლაპვას, თავისი ახალი რუსული იმპერიის შესაქმნელად“

მაკკეინმა ასევე განაცხადა, რომ „აშშ-მ და ევროპამ უნდა შეწყვიტონ ფიქრი იმაზე, რომ უკრაინისთვის ლეტალური სამხედრო იარაღის გადაცემა პუტინის შემდგომი აგრესიის პროვოცირებას მოახდენს“

სენატორის თქმით, პუტინის პროვოცირებას აშშ-ს და ევროკავშირის თავშეკავება იწვევს.