უფლებადამცველების განმარტებით, მათ ამ დრომდე არ გადასცემიათ საქმის მასალები, რის გამოც დაცვის განხორციელებისა და სტრატეგიის შემუშავების შესაძლებლობა არ ეძლევათ.

ადვოკატები ამბობენ, რომ საქმეზე საიდუმლო გრიფის მოხსნის პროცესში ბიუროკრატიული ბარიერი ხელოვნურად იქმნება და კონტრდაზვერვას საქმის მასალები შესასწავლად ამ დრომდე არ აქვს მიღებული.

„ფაქტობრივად დაცვის მხარემ, ვერ შეძლო კონკრეტულ მტკიცებულებებზე დაყრდნობით თავის პოზიციის ჩამოყალიბება, მაშინ როდესაც პროკურატურას მიუწვდებოდა ხელი ყველაფერ ამაზე და მხარეები აღმოჩნდნენ აბსოლუტურად არათანაბარ მდგომარეობაში. ვისაც არ ეზარება, ეს არის პარლამენტის წევრი, პროკურატურის თანაშრომელი, თუ სხვა პირი, ყველა ლაპარაკობს ამ საქმის დეტალებზე. განსაკუთრებით განმაცვიფრა დავით საგანელიძის განცხადებებმა, რომელმაც პირდაპირ ბრალი დასდო ამ პირებს და ამასთან, ინტერვიუში განაცხადა, რომ თითქოს "ქართული ოცნების" პოლიტსაბჭოს სხდომაზე იხილებოდა დეტალები ამ ბრალდებისა," - აღნიშნა ადვოკატმა სოსო ბარათაშვილმა

ბარათაშვილი არ გამორიცხავს, რომ დავით საგანელიძეს, გაკეთებული განცხადების საფუძველზე, სასამართლოში უჩივლოს.

ადვოკატის ლევან სამუშიას მტკიცებით, მათ პროკურატურა არათანაბარ პირობებში აყენებს, რადგან ამ დრომდე არ აძლევენ საქმის მასალების ასლებს და შესაბამისად, მათ საქმის შესწავლის და 11 დეკემბერს დანიშნული პროცესისთვის მომზადების საშუალება არ ეძლევათ.

დაკავებულთა ინტერესების დამცველები პოლიტიკოსებს მოუწოდებენ, ამ სისხლის სამართლის საქმის პოლიტიზება არ მოხდეს და სამართლებრივი პროცესის წარმოების საშუალება მიეცეთ.

„მოვუწოდებ საზოგადოებას ,განსაკუთრებით პოლიტიკოსებს ნუ დაარღვევენ უდანაშაულობის პრეზუმფციას და უდანაშაულო ადამიანებს სასამართლოს გარეშე ნუ დადებენ ბრალს წინასწარ“-აცხადებს სამუშია.