არის ჯვარი, რომელსაც უფალი აკურთხებს ჩვენთვის, არის ჯვარი, რომელსაც ჩვენ ვირჩევთ

რელიგია - 10:25, 06 Nov, 2014

3039

არის ჯვარი, რომელსაც უფალი აკურთხებს ჩვენთვის, არის ჯვარი, რომელსაც გარემოებები გვკიდებენ, არის ჯვარი, რომელსაც ჩვენ ვირჩევთ. სულის შინაგანი დახვეწა გარეგნულთან მადლიერი შეგუების ფონზე - ყველაზე “მსუბუქი” ჯვარია, რომლის არჩევის თავისუფლება ჩვენ გვაქვს, ყველა სხვა გზა საკუთარი ‘’მეს’’ განადგურების გზაა. ვინც ამ გზას აირჩევს, ჭეშმარიტ თავისუფლებას მოიპოვებს. რევოლუცია ეფექტურია მხოლოდ ერთი პიროვნების სულში, სოციალური რევოლუცია კი სრულიად უსარგებლოა, რამეთუ მხოლოდ ძველი სტერეოტიპების ახლით შეცვლა ხდება.

ერში უსარგებლო ქცევის მოდელელების იდეალიზირება ხდება, ხოლო სულის ზურმუხტებს ხშირად სანაგვეზე ყრიან: აქ "სწორი" ცხოვრება უაზრო სტერეოტიპებთან მუდმივი კონფორმიზმია. ამიტომ მთავარია შევცვალოთ ჩვენი განწყობა და შინაგანი დამოკიდებულება ამაოებისადმი! რაც უფრო ვდისტანცირდებით მისგან, მით მეტ სულიერ სიმშვიდეს მოვიპოვებთ. სიმშვიდე კი სულის აღორძინების მთავარი ფაქტორია. მხოლოდ ამის მერე მოდის მადლიანი ლოცვა და სულიერი სიხარული.
ჭეშმარიტი ბედნიერება სულის სტერეოტიპებისგან განთავისუფლებაა. მიწიერი ბედნიერება დიდი გრძნობისმიერი დაძაბულობით ხასიათდება და ფანტასტიურ უეცარ აფექტს იწვევს, მაგალითად, როცა ადამიანი მილიონ დოლარს მოიგებს კაზინოში. მაგრამ, სულიერი სიმშვიდე გაცილებით უფრო დიდი მონაპოვარია, ვიდრე ეს აფექტი. პირველი არ იწვევს საბოლოო დაკმაყოფილებას: რაც არ უნდა დიდ წარმატებას მიაღწიო, ისევ ახალი გინდა. მეორე კი სრულ სიმშვიდესა და დაკმაყოფილებას გგვრის. თუმცა კაცია და გუნება, ვის რა ურჩევნია იმას ირჩევს!