მთავარი პროკურორის პირველი მოადგილის ირაკლი შოთაძის განცხადებით, თავდაცვის უწყებასთან დაკავშირებულ სისხლის სამართლის საქმეებზე, მხოლოდ პოლიტიკური განცხადებები და სპეკულაციები კეთდება.

შოთაძის განცხადებით „თავდაცვის სამინისტრო აპირებდა ოპტიკურ ბოჭკოვანი მაგისტრალის შეძენას და შეიძინა მხოლოდ ამ ოპტიკურ ბოჭკოვან მაგისტრალში კაბელის რამდენიმე წვერი“

„თავდაცვის სამინისტროს არაკეთილსინდისიერმა მაღალჩინოსნებმა გაფლანგეს სახელმწიფოს კუთვნილი 4 მილიონი ლარი, ეს არის უპატიებელი დანაშაული და პროკურატურა არ აპირებს ამასთან შერიგებას, ის რომ ვიღაცეები ცდილობენ ამისთვის პოლიტიკური სარჩულის მიწებებას, ეს არის მხოლოდ სპეკულაციები და ამას სისხლის სამართლის გამოძიებასთან არანაირი კავშირი არ აქვს“- აცხადებს შოთაძე.

შოთაძის თქმით „განცხადებები, რომ პროკურატურის თავდასხმის ობიექტი არის თავდაცვის სამინისტრო არის სასაცილო. თავდაცვის სამინისტრო არის სახელმწიფო უწყება და შესაბამისად პროკურატურა არანაირად არ ახორციელებს უწყებაზე თავდასხმას“

შოთაძე აცხადებს რომ პროკურატურას ქვეყნის საგარეო კურსთან შემხებლობა არ აქვს „თავდაცვის სამინისტრო გუშინაც არსებობდა დღესაც არსებობს და მომავალშიც იარსებებს, მიუხედავად იმისა თავდაცვის სამინისტროში ვინ იმუშავებს და ვინ არა. რაც შეეხება ქვეყნის საგარეო პოლიტიკას და კურსს პროკურატურას ამასთან არანაირი შემხებლობა არ აქვს.“

შოთაძის განცხადებით პროკურატურა ვერ დაელოდება მინისტრის ვიზიტების დასრულებას იმისთვის რომ დამნაშავეები დასაჯოს. „საქართველოს პროკურატურა არ არის თავდაცვის სამინისტროს პროტოკოლის სამსახური, ჩვენთვის საერთოდ არ იყო ცნობილი სად იმყოფებოდა თავდაცვის მინისტრი იმ პერიოდში, ჩვენთვის თავდაცვის მინისტრი ამ შემთხვევაში არ წარმოადგენდა ამ სისხლის სამართლის საქმის მხარეს, შესაბამისად ჩვენთვის არ იყო საინტერესო სად იმყოფებოდა ის, გამოძიება ყოველდღიური პროცესია და შესაბამისად გამოძიება ვერ წავა მივლინებაში და შვებულებაში და ვერ დაელოდება იმის გარკვევას ვინ სად იმყოფება. ის, რომ ჩვენ უნდა გაგვერკვია თავდაცვის მინისტრი სად იყო და სხვა თანამშრომლები სად იმყოფებოდნენ, სცილდება ჩვენს კომპეტენციას.“

შოთაძემ კომენტარი პროკურატურის მიმართ გამოთქმულ კრიტიკის შესახებაც გააკეთა „თითოეული განცხადება მიმართული პროკურატურის დაშინებისკენ არის ჩარევა პროკურატურის საქმიანობაში, ეს ეწინააღმდეგება კანონს და ეწინააღმდეგენა ამ თანამდებობის პირების უფლებამოსილებებს.“- განაცხადა მთავარი პროკურორის პირველმა მოადგილემ „იმედის“ ეთერში