პროკურატურის მიერ დაკავებული თავდაცვის სამინისტროს მაღალჩინოსნების გიორგი ლობჟანიძის და არჩილ ალავიძის ადვოკატის ლევან სამუშიას თქმით, მისი დაცვის ქვეშ მყოფების დაკავების მოტივი ამ დრომდე უცნობი იყო.

სამუშიას თქმით, მას დაკავებულების მონახულების უფლებას არ აძლევენ.

„დაკავების მოტივი ჩემთვის უცნობია. დაკავებული არიან თავდაცვის სამინისტროს მაღალჩინოსნები. ადვოკატები ორი საათია დაკავებულებთან შეხვედრას ვითხოვთ. კანონით გვაქვს უფლება შევხვდეთ მათ და მივიღოთ საგამოძიებო მოქმედებებში მონაწილეობა. გამომძიებელი ამბობს, რომ მხოლოდ მას შემდეგ ვნახავთ ჩვენი დაცვის ქვეშ მყოფებს, რაც წინასწარი დაკავების იზოლატორში გადაიყვანენ“, -განაცხადა სამუშიამ.

საქართველოს მთავარი პროკურატურის მიერ ჩატარებული გამოძიების შედეგად, გამოვლენილ იქნა საქართველოს თავდაცვის სამინისტროს მოქმედი მაღალი თანამდებობის პირების მიერ სახელმწიფო ბიუჯეტის კუთვნილი 4 102 872 ლარის გაფლანგვის ფაქტი.