ISFED უკრაინაში მიმდინარე საპარლამენტო არჩევნებს აკვირდება

მსოფლიო - 16:07, 26 Oct, 2014

1138

26 ოქტომბერს, უკრაინაში საპარლამენტო არჩევნები იმართება. „სამართლიანი არჩევნებისა და დემოკრატიის საერთაშორისო საზოგადოების“ დამკვირვებლები უკრაინაში არჩევნების მიმდინარეობას აკვირდებიან.
ENEMO-ს მისიის ფარგლებში ISFED-ს ორი გრძელვადიანი და 8 მოკლევადიანი დამკვირვებელი ჰყავს უკრაინაში მივლენილი. ISFED-ის გრძელვადიანი დამკვირვებლები, აკვირდებოდნენ უკრაინაში წინასაარჩევნო პერიოდს. დღეს ISFED საპარლამენტო არჩევნებს ოდესაში, ლვოვსა და კიევში აკვირდება.
ბოლოდროინდელი მოვლენებიდან გამომდინარე, 26 ოქტომბრის არჩევნები არ ჩატარდება 12 საარჩევნო ოლქში, რუსეთის მიერ ანექსირებულ ტერიტორიებზე. პრორუსი სეპარატისტები ნოემბერში საკუთარ სეპარატისტულ არჩევნებს გეგმავენ.
უკრაინის საპარლამენტო არჩევნებში მონაწილე პარტიებს 5% -ანი ბარიერის გადალახვა ესაჭიროებათ რადაში ადგილების მოსაპოვებლად. მთავარი პარტიები, რომლებიც გამარჯვებისთვის იბრძვიან უკრაინის პრეზიდენტის, პეტრო პოროშენკოს ბლოკია, სადაც მისი "სოლიდარობის პარტია" და ვიტალი კლიჩკოს პარტიაა გაერთიანებული. ასევე პრემიერ მინისტრის, არსენი იაცენიუკის „სახალხო ფრონტი“, ოლეგ ლიაშკოს „ნაციონალური რადიკალური პარტია“ და ყოფილი პრემიერ მინისტრის, იულია ტიმოშენკოს პარტია „ბატკივსჩინა“.