3000 ლარის ქრთამის აღების ბრალდებით, ვანის საკრებულოს თავმჯდომარის მოადგილე საკუთარი კაბინეტიდან აიყვანეს.
კობა ძაგნიძე დაახლოებით ერთი საათის წინ, საკრებულოს სხდომის დაწყებამდე დააკავეს. ჯერჯერობით დაუდასტურებელი ინფორმაციით, მან ქრთამი ტენდერისთვის აიღო.
ძაგნიძე, რომელიც წინა მოწვევის საკრებულოში თავმჯდომარე იყო, ახლა ფრაქცია "ქართული ოცნება - რესპუბლიკელების" წარმომადგენელია.
მისი თანაპარტიელები აცხადებენ, რომ საკრებულოს მოქმედ თავმჯდომარესა და დაკავებულ ძაგნიძეს შორის დაპირისპირება იყო. თუმცა ქრთამის აღების ფაქტზე მათ ინფორმაცია არ აქვთ.
ადგილობრივი საკრებულოს წევრების ინფორმაციით, ფინანსურმა პოლიციამ დაკავებული ქუთაისში, ფინანსურ პოლიციაში დაკითხვაზე გადაიყვანა.
ფინანსური პოლიცია ჯერჯერობით არანაირ კომენტარს არ აკეთებს. ოფიციალური განცხადება მოგვიანებით გაკეთდება.
მასალის გამოყენების პირობები






