ადიგენის სოფელ მოხეში დაკავებულ 14 ადამიანს ბრალს დღეს წაუყენებენ. მათი გათავისუფლების მოთხოვნით, ახალციხის პოლიციის სამმართველოსთან მთელი ღამის განმავლობაში ადიგენის რაიონის 11 სოფლის მცხოვრებლები იმყოფებოდნენ. რამდენიმე ადამიანი კვლავ შენობასთან რჩება.

ადგილობრივი მუსლიმები აცხადებენ, რომ პოლიცია დაკავებისას რამდენიმე ქალბატონს ფიზიკურად შეეხო და მათი უფლებები დაარღვია.

ისინი დაკავებულთა გათავისუფლებასთან ერთად, სოფელ მოხეში სადავო შენობის კვლავ მეჩეთად გადაკეთებას ითხოვენ. შენობას კი ათწლეულების განმავლობაში კულტურის სახლის სტატუსი ჰქონდა. ამჟამად იქ შენობის სარემონტო სამუშაოები მიმდინარეობს და მისი ბიბლიოთეკად გადაკეთება იგეგმება.

სწორედ სარემონტო სამუშაოების მიმდინარეობას მოჰყვა დაპირისპირება სოფელ მოხეში გუშინ ადგილობრივ მუსლიმებსა და პოლიციას შორის. 14 ადამიანი პოლიციასთნ დაპირისპირების შემდეგ დააკავეს.

შინაგან საქმეთა სამინისტროს ინფორმაციით, 11 მათგანი ადმინისტრაციულ სამართალდარღვევათა კოდექსის ორი მუხლით - წვრილმანი ხულიგნობისა და პოლიციის დაუმორჩილებლობისთვის, სამი კი სისხლის სამართლის კოდექსის მუხლით - პოლიციის მიმართ ჯგუფური წაინააღმდეგობისთვის დააკავეს.

დაპირისპირების მიუხედავად, ადგილობრივი ხელისუფლების განცხადებით, სარემონტო სამუშოები გაგრძელდება და შენობაში ბიბლიოთეკა განთავსდება.

ეს საკითხი განიხილეს სოფელ მოხეში ინციდეტის ამოწურვის შემდეგ სამცხე-ჯავახეთის გუბერნატორთან ადგილობრივმა მართლმადიდებლებმა. მათი განცხადებით, არ სურთ მუსლიმ მოსახლეობასთან დაპირისპირება. თუმცა ამბობენ, რომ მეჩეთის მშენებლობის წინააღმდეგი არიან, რადგან ერთი მეჩეთი სოფელში უკვე არსებობს. მართლმადიდებელი მოსახლეობის აზრით, შენობაში ბიბლიოთეკის განთავსება საკუთესო გადაწყვეტილებაა, რადგან ასეთი დაწესებულება სოფელს სჭირდება და ბიბლიოთეკით, რელიგიური კუთვნილების მიუხედავად, ყველა ერთნაირად ისარგებლებს.