საკუთარ სარჩელში ავტორები განათლების სამინისტროს საავტორო და ინტელექტუალური საკუთრების უფლების დარღვევაში ადანაშაულებენ.

საუბარია გამომცემლობების დაკვეთით მეცნიერების მიერ მომზადებულ იმ სასწავლო პროგრამებზე, რომლებიც, მოსარჩელეთა მტკიცებით, განათლების სამინისტრომ ნებართვის გარეშე გამოიყენა.სარჩელი სასამართლოში საავტორო უფლებებისა და კერძო საკუთრების უფლების დარღვევაზე იყო შეტანილი. კომპანიები 15 მილიონი ლარის ზარალის ანაზღაურებასაც მოითხოვდნენ.

გამომცემლები გადაწყვეტილებას "უკანონოსა" და "უსამართლოს" უწოდებენ და აცხადებენ, რომ ამით სასამართლო გამომცემლების ინტელექტუალური და კერძო საკუთრების უფლებას უხეშად არღვევს.

„სასამართლომ დააკანონა ის რეკეტი, რაც ჩაიდინა განათლების სამინისტრომ,“- ასე აფასებს გამომცემლობა „ინტელექტის“ ხელმძღვანელი კახმეგ კუდავა სასამართლოს მიერ მიღებულ გადაწყვეტილებას.

გამომცემლები გადაწყვეტილების გასაჩივრებას გეგმავენ. არ არის გამორიცხული, რომ საქმეზე სამართლებრივი დავა სტრასბურგში გაგრძელდეს.