ოჯახისა და ადვოკატის მტკიცებით, 27 წლის მალხაზ ტოტოლაშვილი, რომელიც დაკავებისას სრულიად ჯანმრთელი იყო, ახლა ეტლსაა მიჯაჭვული და დამოუკიდებლად გადაადგილება არ შეუძლია. ეს ყველაფერი კი ციხეში ცემის შედეგია.

სასჯელაღსრულების სამინისტროში ამას უარყოფენ და ამბობენ, რომ ბრალდებულისთვის ფიზიკური შეურაცხყოფა არავის მიუყენებია.

პატიმრის დედის ვერსია ასეთია: 2014 წლის 23 აგვისტოს მარიხუანას განმეორებით მოხმარების ფაქტზე 27 წლის მალხაზ ტოტოლაშვილი დააკავეს და გლდანის მე-8 დაწესებულების წინასწარი პატიმრობის იზოლატორში მოათავსეს. იმავე ღამეს იგი ციხის უფროსის მოადგილემ და რეჟიმის უფროსმა სცემეს. მეორე დღეს, 24 აგვისტოს, ბრალის დადასტურებისას პროცესზე პატიმარმა ცემის შესახებ საჯაროდ განაცხადა და ეს ყველაფერი სასამართლოს ოქმშიც ჩაიწერა.

იმავე დღეს, როდესაც პატიმარი უკან, გლდანში დააბრუნეს, უარესად სცემეს. ციხის უფროსის მოადგილეს და რეჟიმის უფროსს ახლა უკვე ბადრაგის 7 წევრი ეხმარებოდა. დედის , ირინა იჩქიტიძის მტკიცებიტ, მალხაზ ტოტოლაშვილი სწორედ მაშინ „მოწყდა წელს ქვემოთ“

ფაქტს კატეგორიულად უარყოფენ სასჯელარსრულების სამინისტროში და აცხადებენ , რომ მალხაზ ტოტოლაშვილი დაკავების მომენტში უკვე შეზღუდული შესაძლებლობების მქონე იყო და გლდანის მე-8 დაწესებულებაში განთავსების დროს დაფიქსირდა როგორც შეზღუდული შესაძლებლობების მქონე პირი. მისთვის ფიზიკური შეურაცხყოფა არავის მიუყენებია, მან კი მე-8 დაწესებულებაში ყოფნის პერიოდში თანამშრომელს სიტყვიერი შეურაცხყოფა მიაყენა. მის მიმართ დაიწყო ადმინისტრაციული წარმოება. შემდგომ ის გადაყვანილი იქნა ბათუმში სადაც ასევე არანაირი ფიზიკური შეურაცხყოფა და ცემა არ ყოფილა.

ტოტოლაშვილის ადვოკატის ვახტანგ თალაკვაძის განცხადებით, ის თავისუფლად დადიოდა და დაკავებისას დაწესებულებაში თავისი ფეხით შევიდა.

"სამედიცინო დოკუმენტაციით დადგენილია, რომ დაზიანებები ცემის შედეგად აქვს მიღებული,ყველ;აზე მთავარი კი ისაა რომ ძიების პროცესში პატიმარი, 400კილომეტრით შორს წაუყვანეს. რა უნდოდა ბათუმში, როცა არც დანაშაული მომხდარა იქ, არც იქაურია და არც საქმის ძიება არ იყო დასრულებული"

ტოტოლიშვილისთვის განაჩენი 21 ოქტომბერს უნდა გამოეტანათ , თუმცა სასამართლო პროცესზე იგი ვერ გამოცხადდა და სხდომა 30 ოქტომბრამდე გადაიდო. არგამოცხადების მიზეზი იყო ის რომკ პატიმარი თბილისში წამოყვანას სპეციალური სამედიცინო ავტომობილით ითხოვდა და მას თხოვნაზე უარი ეთქვა.

მომზადებულია გაზეთ "რეზონანსის" მიხედვით