საქართველოს თავდაცვის ყოფილი მინისტრის, ბაჩო ახალაიას მეუღლის, ანი ნადარეიშვილის განცხადებით, მოსამართლე ბუგიანიშვილს დავალება აქვს მიცემული იმასთან დაკავშირებით, რომ „მთელი მათი ოჯახი ციხეში ჩასვას“. ეს განცხადება ნადარეიშვილმა დღევანდელი სასამართლო პროცესის შემდეგ გამართულ ბრიფინგზე გააკეთა:

„ბესიკ ბუგიანიშვილი არის მოსამართლე, რომელმაც უკანონო გადაწყვეტილება მიიღო დათა ახალაიას საქმეში და მას მიუსაჯა უფლებამოსილების გადამეტება 4 წლით თავისუფლების აღკვეთის სახით, რაც საბერძნეთის სასამართლომ სცნო უკანონოდ. მან დღეს გაასამართლა ბაჩო ახალაია არარსებული - წამების მუხლით; იგი ასამართლებს ასევე ჩემს ძმას ვაკო ნადარეიშვილს; მას პირადად აქვს მიღებული დავალება და იგი მოექცა ამ ზემოქმედების ქვეშ და რატომღაც შეშინდა. იმედი მქონდა, რომ ის არ გატყდებოდა, მაგრამ მას პირდაპირ აქვს დავალება, რომ მთელი ჩვენი ოჯახი ჩასვას ციხეში“, - განაცხადა ნადარეიშვილმა.

შეგახსენებთ, რომ დღეს გამართულ სასამართლო პროცესზე ბაჩო ახალაიას ე.წ. ნავთლუღის სპეცოპერაციის საქმეზე 7 წლითა და 6 თვით თავისუფლების აღკვეთა მიესაჯათ. მასთან ერთად ბრალდებულ ლევან ქარდავასა და გიორგი მაზმიშვილს 11-11 წლით, ხოლო ძებნილ მეგის ქარდავას 7 წლითა და 6 თვით თავისუფლების აღკვეთა მიესაჯათ.