რამდენიმე დღის წინ ავსტრალიელმა სამართალდამცავებმა 28 წლის მამაკაცი დააკავეს, რომელსაც 4 ცოლი, 7 საცოლე და 5 საყვარელი ჰყავდა. რა თქმა უნდა ქალბატონებმა ერთმანეთის არსებობის შესახებ არაფერი იცოდნენ და თავი „ერთადერთი“ ეგონათ.

სონკა ტიჟანს საკუთარი საცხოვრებელი არ ჰქონდა. როგორც დაკავებულმა აღნიშნა, მას ერთფეროვნება არც ქალების და არც საცხოვრებელი სახლების შემხთვევაში არ იზიდავს, ამ მეთოდს კი სწორედ მრავალფეროვნების გამო მიმართა.

ყოველივე კი მას შემდეგ გაირკვა, რაც შავკანიანმა „კაზანოვან“ ბარში სონია მაიერი გაიცნო. მაიერმა ჩათვალა, რომ ეს ყველაფერი ერთი ნახვით შეყვარების ტოლფასი იყო, ერთთვიანი ურთიერთობის შემდეგ, წყვილი დაქორწინა. ერთი წლის შემდეგ კი ფეხმძიმე მაიერმა „ფეისბუქზე“ აღმოაჩინა ქალის პროფილი, რომლის გვარიც ტიჟანი იყო. ატვირთულ ფოტოებში კი ქალბატონის ქმარი ძალიან ჰგავდა მის მეუღლეს.

„თავდაპირველად ვიფიქრე, რომ ტყუპები იყვნენ. მე იმასაც კი ვერ ვიფიქრებდი, რომ მღალატობდა. მაგრამ რაც უფრო მეტად ვეცნობოდი ამ ქალის პროფილს, უფრო მეტად ვრწმუნდებოდი, რომ რაღაც ისე არ იყო, როგორც უნდა ყოფილიყო. საბოლოოდ მას დავუკავშირდი და პოლიციაში განცხადება შევიტანეთ, მაშინ გავიგეთ, რომ მისი და ჩემი ქმარი ერთი და იგივე ადამიანი იყო. ამ დროისათვის ის უკვე გამქრალი იყო“.

ქალბატონების მიერ შეტანილი განაცხადი, გამოძიების წამოწყების საფუძველი გახდა. გამოძიებამ დაადგინა, რომ მამაკაცს ინტიმური ურთიერთობა ერთდროულად 16 ქალბატონთან ჰქონდა. ყველაზე ახალგაზრდა 22 წლის იყო, ყველაზე უფროსი კი 44 წლის. მათი უმრავლესობა აცხადებდა, რომ სონკა მათთან ერთად ცხოვრობდა.

ეს ყველაფერი არ არის: მამაკაცს 4 შვილიც ჰყავს. ორი მისი საყვარელი კი ფეხმძიმედ არის.