„ისლამურ სახელმწიფოსთან“ საბრძოლველად, თურქეთი ერაყელ ქურთებს საზღვარს გაუხსნის, - განცხადება ამის შესახებ ქვეყნის საგარეო საქმეთა მინისტრმა გააკეთა.

მევლუთ ჩავუშოღლუს თქმით, ერაყის პეშმარგის ქურთ მებრძოლებს თურქეთ-სირიის საზღვრის გადაკვეთა და სირიის ქალაქ კობანში შესვლა შეეძლებათ.

ანკარის გადაწყვეტილება ერაყელ და სირიელ ქურთებს „ისლამური სახელმწიფოს“ წინააღმდეგ ერთობლივი ბრძოლის საშუალებას მისცემს.

დღესვე შეერთებულმა შტატებმა ქურთ მებრძოლებს კობანში სამხედრო აღჭურვილობა მიაწოდა.

თურქეთის ხელისუფლება ქურთ მებრძოლებს სირიის საზღვრის გადაკვეთის უფლებას არ აძლევდა. ანკარა მათ „ქურთების მუშათა პარტიასთან“ კავშირში ადანაშაულებს. თურქეთში „ქურთების მუშათა პარტია“ ტერორისტულ ორგანიზაციადაა მიჩნეული, რომელიც უკვე 30 წელია თვითმმართველობისთვის იბრძვის.