ადვოკატი მალხაზ ველიჯანაშვილი „ტაბულას“ ფოტოგრაფს ალექსანდრე გიორგაძეს პირადად ესაუბრა.

მისი თქმით, დაკავებულმა უთხრა, რომ უფორმო პოლიციელი დაეჯახა და რაცია დაუვარდა. როგორც ადვოკატი ფოტოგრაფზე დაყრდნობით აცხადებს, გიორგაძემ თავად მიაწოდა პოლიციელს ძირს დავარდნილი რაცია, რის შემდეგაც დააკავეს.

"პირადად ვესაუბრე ტაბულას ჟურნალისტს. აცხადებს, რომ ის საერთოდ არაფრის გამოა დაკავებული, იდგა ჩვეულებრივ, იღებდა ფოტოებს, დაეჯახა პოლიციის თანამშრომელი, რომელიც როგორც თავად აცხადებს, უფორმო ყოფილა. რაცია რომ გაუვარდა, მხოლოდ ამის შემდეგ შეიტყო, რომ პოლიციის თანამშრომელი იყო. გიორგაძემ თავად მიაწოდა რაცია, რომელიც დაბლა ეგდო, ამის შემდეგ კი, აუყვანიათ და წაუყვანიათ. რა არის ამაში ან წინააღმდეგობის გაწევა, ან ადმინისტრაციული სამართალდარღვევა ან წვრილმანი ხულიგნობა საერთოდ? მიმაჩნია, რომ სასამართლო ამ ყველაფერს გაითვალისწინებს" - აცხადებს ველიჯანაშვილი.

მისივე ინფორმაციით, გუშინდელი აქციის დროს დაკავებული ლევან კვარაცხელიას საქმე გადაკვალიფიცირდა და დაკავებული ადმინისტრაციულის ნაცვლად, სისხლის სამართლის საქმით სამართალდამრღვევად ცნეს.