გერმანული ჟურნალი Spiegel გერმანიის ფედერალური სადაზვერვო სამსახურის ხელმძღვანელ გერჰარდ შინდლერზე დაყრდნობით წერს, რომ მალაიზიური ბოინგ-MH17, რომელიც დონეცკის ოლქის თავზე მიფრინავდა, პრორუსმა ტერორისტებმა ჩამოაგდეს.

Spiegel-ის ცნობით, ამის შესახებ ნათქვამია სადაზვერვო სამსახურის მიერ გერმანიის ბუნდესტაგის საიდუმლო კომიტეტისათვის წარდგენილ დეტალურ დასკვნაში. როგორც ცნობილია, სწორედ ეს კომიტეტი აკონტროლებს სპეცსამსახურების მუშაობას.

დასკვნას თან ერთვის მრავალი დოკუმენტური მასალა, მათ შორის გაშიფრული თანამგზავრული ჩანაწერები და ფოტომასალები.

აქვე მოყვანილია ინფორმაცია, რომ ტერორისტებმა გამოიყენეს საზენიტო კომპლექსი "Бук".

გერჰარდ შინდლერი აცხადებს, რომ მისი სამსახური ამ დასკვნაში ერთსულოვანია. გერმანიის ფედერალურმა სადაზვერვო სამსახურმა გამოძიება მას შემდეგ დაიწყო, რაც გერმანიის პარლამენტმა ჩათვალა, რომ ამ ფაქტით ჩადენილია სამხედრო დანაშაული.