სიმპტომები, რომლებიც ამა თუ იმ ვიტამინის დეფიციტის გამოვლენაში დაგეხმარებათ

ეს საინტერესოა - 14:50, 16 Mar, 2018

12951

იმისთვის, რომ გაარკვიოთ რომელი ვიტამინი აკლია თქვენს ორგანიზმს, ექიმები მცირეოდენი დაკვირვებისკენ მოგიწოდებენ. მაგალითად:
A ვიტამინი გჭირდებათ, თუ კანი გამოგიშრათ, დაგიქვეითდათ მადა, გაგიფუჭდათ მხედველობა, გინდებათ ნესვი. ამ ვიტამინის დეფიციტის შესავსებად რაციონი გაამდიდრეთ ცხიმიანი თევზით, კვერცხის გულით, კარაქით. მიირთვით ყვითელ-ნარინჯისფერი პროდუქტები (სტაფილო, ტკბილი წიწაკა).

B ვიტამინი გჭირდებათ, თუ ხშირად გაქვთ სურდო, გტანჯავთ უძილობა, თმას დაეკარგა ბრწყინვალება და გცვივათ, ამინდის ცვალებადობის დროს გეწყებათ თავის ტკივილი. ასეთი სიმპტომების შემთხვევაში მიირთვით ბოსტნეული, მარცვლეული, კომბოსტო (უმი და მწნილის სახით), მსხვილად დაფქვილი ხორბლის პური და თხილი (ან მზესუმზირა) არანაკლებ 50 გრამისა დღეში.

C ვიტამინი გჭირდებათ, თუ გიჭირთ კონცენტრირება, ცუდად გიხორცდებათ ჭრილობები, კბილების ხეხვის დროს სისხლი გდით ღრძილებიდან, გასუქდით, მიუხედავად იმისა, რომ უწინდებურად იკვებებით. ასეთ დროს მიირთვით ციტრუსები, ბროკოლი, ისპანახი. დალიეთ ასკილის ნაყენი. შეამცირეთ ან საერთოდ უარი თქვით ნიკოტინსა და ალკოჰოლზე, რომელიც ორგანიზმიდან გამოდევნის C ვიტამინს.

D ვიტამინი გჭირდებათ, თუ გაღიზიანებული ხართ, სისუსტეს გრძნობთ, სახსრები გაწუხებთ, გაგიფუჭდათ კბილის საფარის მდგომარეობა. D ვიტამინის ნაკლებობის გამო ორგანიზმი ცუდად ითვისებს კალცს. ამიტომაც ზარალდება კბილები და ძვლები. ხშირად ისეირნეთ მზეზე, ეწვიეთ სოლარიუმს. პროდუქტებიდან მიირთვით ოკეანის ცხიმიანი თევზი, სალათები კი მცენარეული ზეთით შეაზავეთ.