საქალაქო სასამართლოში ე.წ. ნავთლუღის სპეცოპერაციის საქმეზე არსებითი განხილვა დასრულდა .

მოსამართლე განაჩენს 22 ოქტომბერს 10:00 საათზე გამოაცხადებს.

სასამართლო სხდომაზე თავდაცვის ყოფილმა მინისტრმა, ბაჩო ახალაიამ დასკვნით სიტყვაში მიმდინარე საქმეზე დაწვრილებით ისაუბრა და თქვა, რომ მის წინააღმდეგ პოლიტიკური დევნა მიმდინარეობს და პროკურატურა გამოგონილი მტკიცებულებებით ცდილობს მისი და მისი მეგობრების დანაშაულის დამტკიცებას.

სასამართლო პროცესის მიმდინარეობისას პროკურატურა და დაცვის მხარე ურთიერთბრალდებებით გამოვიდნენ. პროკურორი ნინო აღლემაშვილი დაცვის მხარის მიერ სასამართლოზე ცრუ ინფორმაციების წარდგენაზე საუბრობდა, დაცვის მხარე კი საქმეში საეჭვო დაზარალებულების არსებობას აპროტესტებს.

„დაცვის მხარე ცდილობდა, მოსამართლისთვის ტყუილი ეთქვა არამხოლოდ მოწმის ჩვენებასთან დაკავშირებით, არამედ ცრუობდნენ, როდესაც სასამართლო სამედიცინო ექსპერტიზისა და სხვა ექსპერტიზის დასკვნებს მიმოიხილავდნენ,“ - განაცხადა ნინო აღლემაშვილმა.

ადვოკატ რომეო საჯაიას თქმით, მან მოსამართლეს კიდევ ერთხელ შეახსენა, რომ პროკურატურის ე.წ. დაზარალებულები არიან „ყაჩაღობისთვის, მანქანის გატაცებისთვის, ქურდობისთვის და ნარკოტიკული საშუალებების შეძენისთვის ნასამართლევი პირები. ჩვენ გვაქვს საქმე იმასთან, რომ დღეს პროკურატურა და კრიმინალი არის შერწყმული.“