მილანში რუსეთისა და უკრაინის პრეზიდენტების შეხვედრა გაიმართა. საათნახევრიანი ოფიციალური საუზმე იტალიის პრემიერმინისტრ მატეო რენცის ორგანიზებით გაიმართა.

შეხვედრაში ბრიტანეთის პრემიერმინისტრი, გერმანიის კანცლერი და საფრანგეთის პრეზიდენტიც მონაწილეობდნენ.

განხილვის მთავარი თემა უკრაინის კონფლიქტი იყო. მანამდე, ორმხრივ ფორმატში, უკვე შეხვდნენ ერმანეთს ვლადიმერ პუტინი და ანგელა მერკელი.

შეხვედრა 2-საათნახევარს გაგრძელდა. გერმანიის კანცლერმა და რუსეთის პრეზიდენტმა უკრაინის კონფლიქტის მოსაგვარებლად მინსკის შეთანხმების განხორციელებისა და ბუნებრივი აირის საკითხები განიხილეს.

ვლადიმერ პუტინის პრესმდივნის განცხადებით, უკრაინის შიდა კონფლიქტსა და მის გამომწვევ მიზეზებზე მხარეებს შორის სერიოზული აზრთა სხვადასხვაობა არსებობს.

შეხვედრის დასრულების შემდეგ იტალიის პრემიერმა განაცხადა, რომ აზრთა სხვადასხვაობის მიუხედავად შეხვედრამ კონსტრუქციულ გარემოში ჩაიარა. მილანში პოროშენკო მერკელთან და ოლანდთან ერტად რუსეთის პრეზიდენტთან დღეს კიდევ ერთ შეხვედრას გამართავს.

ვლადიმერ პუტინთან შეხვედრამდე მილანში ანგელა მერკელი უკრაინის პრეზიდენტს შეხვდა. პეტრო პოროშენკოს განცხადებით, გერმანიის კანცლერმა უკრაინის მიმართ უდიდესი მხარდაჭერა და სოლიდარობა გამოხატა.