რამდენიმე დღის წინ გატაცებული 19 წლის იოსებ გიორხელიძის საქმეზე მომღერალ ზურაბ კობეშავიძეს და მამამისს დაკითხავენ.

გავრცელდა ინფორმაცია, რომ იოსებ გიორხელიძე გამტაცებლებს არმაზში, მომღერალ ზურაბ კობეშავიძის და მამამისის, ჰამლეტ კობეშავიძის აგარაკზე ჰყავდათ გადამალული. ამასთან, სახლის პატრონებს არც გატაცებულის, არც გამტაცებლების შესახებ ინფორმაცია არ აქვთ და არც საკუთარ აგარაკზე ჩატარებულ საგამოძიებო მოქმედებებზე იციან რამე. "არავის უთქვამს ჩვენთვის და ვინც ჩაატარა ოპერაცია, ისინი არიან დასაჭერები", - განაცხადა ჰამლეტ კობეშავიძემ.

იოსებ გიორხელიძის გატაცებაში ბრალდებულ 4 პირს აღკვეთის ღონისძიებად პატიმრობა გუშინ შეეფარდათ. ადვოკატი მათგან მხოლოდ ერთის, ალექსანდრე ჭანტურიას ინტერესებს იცავდა, რომელმაც დანაშაული აღიარა.

მომღერალ ზურაბ კობეშავიძის მშობლები ამბობენ, რომ მათ არც გატაცებულის და არც გამტაცებლების შესახებ არა აქვთ ინფორმაცია. როგორც ამბობენ, მათ არც საკუთარ აგარაკზე ჩატარებულ საგამოძიებო მოქმედებეზე იცოდნენ რამე.

საქმე ის არის, რომ პროკურორმა სასამართლო პროცესზე განაცხადა, რომ გატაცებული არმაზში მდებარე ერთ-ერთ აგარაკზე ჰყავდათ დამალული, რომელიც ვინმე ჭუმბურიძეს ეკუთვნოდა. პროკურატურის მიერ გავრცელებული ფოტომასალაზე ასახული სახლი კი კობეშავიძეების აგარაკის იდენტური ჩანს. "კურიერის" ჯგუფს, რომელიც ამ სახლში იმყოფებოდა, ჯერ დაუდასტურეს, რომ ეს სახლი მართლაც ვინმე ჭუმბურიძეს ეკუთვნოდა. თუმცა მოგვიანებით ეს ინფორმაცია უარყვეს და თქვეს, რომ სახლი მომღერალ კობეშავიძეს და მის მამს ეკუთვნის, რომელსაც პოლიციელის წოდებაც აქვს.