14 ოქტომბერს ვაკეში, ჭავჭავაძის გამზირზე რაჭის ყოფილი გუბერნატორის - ოთარ სირაძის შვილს და შვილის მეგობარს, მობილური ტელეფონები წაართვეს. „ნიუპოსტი“ აღნიშნულ ფაქტთან დაკავშირებით შინაგან საქმეთა სამინისტროს დაუკავშირდა, სამინისტროს განცხადებით გამოძიება დაწყებულია, თუმცა რა მუხლით არის აღძრული საქმე ჯერჯერობით არ კონკრეტდება.

„ნიუპოსტი“ მომხდარ ინციდენტის დეტალების დასაზუსტებლად დაზარალებული მოზარდის მშობელსაც ესაუბრა:

ოთარ სირაძის განცხადებით მის არასრულწლოვან შვილს და მისი შვილი მეგობარს 14 ოქტომბერის დაახლოებით საღამოს ცხრის ნახევარზე ჭავჭავაძის გამზირზე ვაკის ეკლესიის მიმდებარედ ორი მამაკაცი (დაახლოებით 25-30 წლის) დახვდა, მათ მოზარდებს ტელეფონი სთხოვეს, იმ საბაბით რომ ახლობელთან დარეკვა სურდათ, ერთერთმა მოზარდმა ტელეფონი დასარეკად გადასცა, ერთ-ერთმა მამაკაცმა ტელეფონიდან რამდენიმე ზარის განხორციელება სცადა და ბოლოს განაცხადა რომ არ პასუხობდნენ, რის შემდეგაც მან მოზარდებს ტელეფონის შესახებ საუბარი დაუწყო.

„კარგი ტელეფონია, 100 დოლარად დალომბარდდება და თქვენი სახელით კაი ბიჭებს გავუგზავნით.“- განუცხადეს არასრულწლოვნებს.

მამაკაცებიდან ერთ-ერთმა ტელეფონის ჩვენება მეორე მოზარდსაც მოსთხოვა და ისეთი მოძრაობები გააკეთა, რომ მოზარდებს ეგონათ ჯიბიდან დანას იღებდა. რის შემდეგაც მეორე მოზარდსაც გამოართვეს ტელეფონი.

იმ მომენტისთვის მოზარდებიდან ერთ-ერთმა ბიძაშვილთან დაკავშირება მოახერხა, რომელიც შემთხვევის ადგილზე მივიდა და ტელეფონების დაბრუნება მოსთხოვა. ამის შემდეგ დაპირისპირება ფიზიკურ შეხლა-შემოხლაში გადაიზარდა. საბოლოოდ მათ ტელეფონების გატაცება და მიმალვა მოახერხეს.

მოზარდების განცხადებით, ამ ინციდენტს თვალს ადევნებდა იმ ტერიტორიაზე მდებარე საელჩოს დაცვაც, რომელიც ინციდენტში არ ჩაერია და არც საპატრულო პოლიციაში დარეკა.

როგორც ოთარ სირაძე აცხადებს, ადგილზე მისული სამართალდამცავები ცდილობდნენ რომ საქმისთვის ყაჩაღობის ნაცვლად სხვისი ნივთის მართლსაწინააღმდეგოდ თაღლითურად დაუფლების კვალიფიკაცია მიენიჭებინათ.

მოზარდები დაკითხვაზე იმყოფებოდნენ, გამოძიებას არ დაუკითხავს საელჩოს დაცვა, მათი განცხადებით დიპლომატიური სამსახურის დაცვას ამას სამსახური უკრძალავს.

„საქმე აუცილებლად უნდა იქნას გამოძიებული, რადგან დღეს საქმე ეხება ჩემს შვილს მაგრამ ხვალ სხვასაც შეეხება, როგორც შევარდნაძის დროს იყო ჯერ ერთს გახადეს ტყავის ქურთუკი და ხმა რომ არ ამოიღო, მერე მთელი ქვეყანა გაძარცვეს.“- აცხადებს ოთარ სირაძე.