დღეს წაუყენებენ ბრალს 19 წლის იოსებ გიორხელიძის გატაცებისთვის დაკავებულ პირებს. სასამართლო პროცესი აღკვეთის ღონისძიების შესაფარდებლად თბილისის საქალაქო სასამართლოში 15 ოქტომბერს 11 საათზე გაიმართება.

იოსებ გიორხელიძის გატაცებისთვის 4 პირია დაკავებული. შინაგან საქმეთა სამინისტროს ცნობით, მათგან 2 პირი კონსტიტუციური უსაფრთხოების დეპარტამენტისა (კუდ-ი) და სპეციალური ოპერატიული დეპარტამენტის (სოდ-ი) ყოფილი თანამშრომლები არიან.

შს სამინისტროს ინფორმაციით, იოსებ გიორხელიძე 10 ოქტომბერს საკუთარი სახლიდან იარაღის მუქარით გამოიყვანეს და გაიტაცეს. გამოძიება წინასწარი შეთანხმებით ჯგუფის მიერ ანგარებით მძევლად ხელში ჩაგდების, იარაღის მართლსაწინააღმდეგო შეძენა-შენახვის და ნარკოტიკული საშუალების უკანონო შეძენა-შენახვის ფაქტზე მიმდინარეობს.