ბელგრადის ფაშისტებისგან გათავისუფლების 70 წლისთავთან დაკავშირებით სერბეთს რუსეთის პრეზიდენტი ეწვევა. სერბეთის დედაქალაქის გათავისუფლების დღე ტრადიციულად 20 ოქტომბერს აღინიშნებოდა, წელს კი საზეიმო ღონისძიებების ჩატარება, სამხედრო აღლუმის ჩათვლით 16 ოქტომბრისთვის დაიგეგმა.

სერბეთის ხელისუფლების მსგავსმა ქმედებამ, მედიაში არაერთგვაროვანი რეაქცია გამოიწვია. ისინი ხელისუფლებას პუტინის გამო „ისტორიული კალენდრის შეცვლას“ საყვედურობენ.

თავად სერბეთში კი აცხადებენ , რომ 20 ოქტომბერი ბელგრადის გათავისუფლების კონკრეტულ თარიღად არასოდეს მიიჩნეოდა.

„ბელგრადის გათავისუფლებასთან დაკავშირებული ზეიმი 10-დან 20 ოქტომბრამდე მიმდინარეობს, 20 ოქტომბერი ითვლებოდა უკანასკნელი სამხედრო ოპერაციების დღედ, როდესაც უკანასკნელმა ფაშისტმა დატოვა ქალაქი, 16 ოქტომბერი კი არის , ზუსტად ის დღე, როდესაც ბელგრადის ცენტრი საბჭოთა ჯარებმა დაიკავეს.“ აცხადებს სერბი ჟურნალისტი ნემანია ვრანკოვიჩი.

balkaneu.com-ის ცნობით კი თავდაპირველად აღლუმის ჩატარება 20 ოქტომბერს იგეგმებოდა და 16 ოქტომბრისთვის, სწორედ პუტინის გრაფიკის გამო გადმოიტანეს.

სამხედრო აღლუმი სერბეთში (მანამდე იუგოსლავიაში ) 1985 წლიდან არ ჩატარებულა, წელს დაგეგმილ აღლუმში კი მონაწილეობას 3 ათასზე მეტი სამხედრო მოსამსახურე, არტილერია, ტანკები და ავიაცია მიიღებს მონაწილეობას.

euractiv.com-ის ინფორმაციით, ბელგრადში აღლუმზე პუტინის მოსალოდნელმა დასწრებამ დასავლეთის უკმაყოფილება გამოიწვია. სერბეთში აშშ-ს ელჩმა უკრაინის მოვლენების ფონზე , ვიზიტის „არასწორ კონტექსტზე“ გააკეთა ხაზგასმა.