ფინანსთა სამინისტროს საგამოძიებო სამსახურმა თაღლითობის ფაქტი აღკვეთა. უწყების თანამშრომლებმა „საქართველოს ეროვნული ბანკის“ კუთვნილი თანხების მითვისებისთვის ერთი პირი მისცეს პასუხისგებაში. შპს „პაულ შურელ უნდ ირაო გრუპის" დირექტორს გიორგი მარღაძეს, სამსახურებრივი მდგომარეობის გამოყენებით, ეროვნული ბანკის კუთვნილი დიდი ოდენობის თანხის უკანონოდ დაუფლება ედება ბრალად.

გამოძიების მიხედვით, მარღაძემ „ეროვნულ ბანკსა“ და კომპანია „პაულ შურელ უნდ ირაო გრუპს” შორის სამშენებლო სამუშაოების თაობაზე გაფორმებული ხელშეკრულების ფარგლებში, დამკვეთს მიაწოდა შესრულებული სამუშაოს ყალბი აქტები, სადაც სამუშაოების მოცულობა და ღირებულება ხელოვნურად იყო გაზრდილი. ამ ფინანსური მაქინაციით იგი თაღლითურად დაეუფლა სსიპ საქართველოს ეროვნული ბანკის კუთვნილ 1,246,821 ლარს.

აღნიშნულ ფაქტზე გამოძიება გრძელდება.