ნარკოტიკების შეძენა-შენახვის ბრალდებით დაკავებული ახალგაზრდა, რომლის ახლობლები მის მიმართ პოლიციის მხრიდან განხორციელებულ ზეწოლაზე საუბრობენ, სასამართლომ 10 ათას ლარიანი გირაოს სანაცვლოდ გაათავისუფლა.

გიორგი ადეიშვილის ოჯახის წევრები აცხადებენ, რომ სამართალდამცველები პატიმარზე ზეწოლას ახდენდნენ, რათა მას კიდევ რამდენიმე დანაშაული აეღოს საკუთარ თავზე. ადეიშვილის ოჯახის წევრები აცხადებენ, რომ რამდენიმე დღის წინ დაკავებული 19 წლის ახალგაზრდა ნაცემია და მას აღიარებით ჩვენებას სთხოვენ, წინააღმდეგ შემთხვევაში ნათესავებზე ზეწოლითაც ემუქრებიან.

წარსულში ორჯერ ნასამართლევი 19 წლის გიორგი ადეიშვილი ნარკოტიკული საშუალებების შენახვის გამო დააკავეს. თუმცა, მისი ახლობლები ამტკიცებდნენ, რომ მას ნარკოტიკი პოლიციამ ჩაუდო. ადეიშვილის ოჯახი ასევე ირწმუნება, რომ დაკავების დროს მოზარდს სამართალდამცველები ფიზიკურად გაუსწორდნენ.