ვლადიმირ პუტინი, მოლდოვას, ევროკავშირთან ასოცირების ხელშეკრულების ამოქმედების გადავადებას სთავაზობს. ამის შესახებ მან მინსკში, დამოუკიდებელ სახელმწიფოთა თანამეგობრობის სამიტზე განაცხადა.

რუსეთის მხრიდან ეკონომიკური ზეწოლის შესახებ მოლდოველი კოლეგის შენიშვნის საპასუხოდ რუსეთის პრეზიდენტმა განაცხადა, რომ მოსკოვს ევროკავშირთან მეზობლების დაახლოების საწინააღმდეგო არაფერი აქვს, მაგრამ საკუთარი ბაზრის დაცვის ზომების მიღების უფლება გააჩნია.

"რუსეთი აწარმოებდა ინტენსიურ კონსულტაციებს ევროკავშირთან და უკრაინასთან. ამის შედეგად, მოვილაპარაკეთ ევროკავშირთან ასოცირების ეკონომიკური ნაწილის ამოქმედების 2015 წლის 31 დეკემბრამდე გადადების შესახებ. და სად იყო მოლდოვა? რატომ მოლდოვასთან ვერ ავაწყვეთ ასეთი ურთიერთობა? ჩვენ ეს გვინდოდა და არაერთხელ მოგმართეთ. სამწუხაროდ, მკაფიო პასუხი ჩვენი მოლდოველი მეგობრებისგან ვერ მივიღეთ", - თქვა პუტინმა.