ებოლას ვირუსზე საქართველოში უცხოეთიდან ჩამოსულ 21 პირს აკვირდებიან. დაავადებათა კონტროლისა და საზოგადოებრივი ჯანმრთელობის ეროვნული ცენტრის, სამეცნიერო საბჭოს ხელმძღვანელის, პაატა იმნაძის თქმით, მათი უმეტესობა ნიგერიიდან ჩამოვიდა, სადაც ებოლას ვირუსის რამდენიმე ათეული შემთხვევა გამოვლენილი. იმნაძის თქმით მოსახლეობას პანიკის საფუძველი არ აქვს და ამ მხრივ საგანგაშო არაფერი ხდება.

„ებოლას ვირუსი ძირითადად სამ ქვეყანაშია გავრცელებული- ლიბერიაში, სიერა ლეონეში და გვინეაში, ამიტომ ჩვენს მოსახლეობას ვურჩევთ, თუ გადაუდებელი და აუცილებელი საქმე არ აქვთ, თავი შეიკავონ ამ ქვეყნებში გამგზავრებისგან. იქ მყოფებს კი ვურჩევთ, აუცილებლად დაიცვან ჰიგიენა, თავი აარიდონ სისხლთან, სხვა ბიოლოგიურ სითხეებთან და ცხოველებთან კონტაქტს.“-აცხადებს იმნაძე.

მისი თქმით, აეროპორტში კონტროლი გამკაცრებულია და ყველა ვინც ჩამოდის იმ ქვეყნებიდან სადაც ებოლას ვირუსი დაფიქსირდა , მკაცრ კონტროლზეა აყვანილი.

“სახლში არიან, თუმცა ჩვენ პერიოდულად ვეკონტაქტებით და ვიგებთ, რომ თავიც არ წამოსტკივდეთ, დაკვირვების ქვეშ 21 დღის განმავლობაში გვყავს“- აღნიშნავს პაატა იმნაძე.

ებოლას ვირუსი მძიმედ მიმდინარე ვირუსული დაავადებაა, რომელიც ადამიანებში ხშირად ლეტალური შედეგით მთავრდება. ებოლას ვირუსი პირველად აღმოჩენილი იქნა 1976 წელა კონგოს რესპუბლიკაში, მდინარე ებოლასთან.

დაავადების სიმპტომია ორგანიზმიდან სისხლდენა, ებოლას ვირუსის გავრცელება ხდება პირდაპირი გზით დაავადებული ადამიანის ბიოლოგიური სითხეების მეშვეობით (სისხლი,შარდი,განავალი,ნერწყვი და სხვა გამონადენი). ებოლა არ ვრცელდება ჰაერით, საკვებით და წყლით. ინკუბაციური პერიოდი ინფიცირებიდან პირველი სიმპტომების გამოვლენამდე შეადგენს 2-21 დღეს.

დაავადების ბუნებრივი რეზერვუარი უცნობია, ებოლას გადამტანებად მიიჩნევიან ღამურები.