„უკრაინის აღმოსავლეთით სიტუაცია არამდგრადია და შესაძლოა უახლოეს დღეებში უფრო მეტად დაიძაბოს“, - ამის შესახებ განცხადება ნატო-ს გენერალური მდივნის მოადგილემ Deutsche Welle-სთან საუბრისას გააკეთა.

„ძალიან არასტაბილური სიტუაციაა. დაზავება არ შეინიშნება გარკვეულ რაიონებში და შესაძლოა, უახლოეს დღეებში სიტუაცია კიდევ უფრო მეტად დამძიმდეს“, - განაცხადა მან.

მისივე თქმით, რუსეთმა სეპარატისტებს უნდა განუმარტოს, რომ იგი 9 ნოემბერს დანიშნულ არჩევნებს არ ემხრობა. „ისინი ვერავითარ ლეგიტიმურობას ვერ მიაღწევენ“, - განმარტა ვერშბოუმ.

მან აღნიშნა, რომ მინსკის შეთანხმება უნდა განხორციელდეს სრულად და არა შერჩევით.

„ვვარაუდობდით, რომ შეთანხმების განხორციელება 19 სექტემბრიდან დაიწყებოდა, სეპარატისტები, რუსეთის მხრიდან განუწყვეტელი სამხედრო მხარდაჭერის გამო, ამძაფრებენ სიტუაციას დონეცკის აეროპორტზე თავდასხმებით“, - განაცხადა რედაქციასთან საუბრისას ვერშბოუმ.

მისი აზრით, რუსეთი ცდილობს „გაყინოს“ კონფლიქტი დონბასში და არსებობს სერიოზული რისკები იმისა, რომ რუსეთს ეს გამოუვა.

„მე ვთვლი, რომ არსებობს სერიოზული საშიშროებები ამ ყოველივეს რეალობაში მოსაყვანად და ასევე მივიჩნევ, რომ ეს არის ის, რის გაკეთებასაც რუსეთი ცდილობს უკრაინის აღმოსავლეთში“, - დასძინა ვერშბოუმ.

ანანო კვაჭანტირაძე