თურქეთის საგარეო უწყების ხელმძღვანელის, მევლუთ ჩავუსოღლუს განცხადებით, თურქეთი არ აპირებს სირიაში ექსტრემისტების გაერთიანება „ისლამური სახელმწიფოს“ წინააღმდეგ სახმელეთო ოპერაცია მარტომ განახორციელოს , რადგან ეს არ მიაჩნია „რეალისტურ მიდგომად“.

ჩავუსოღლუმ ამ შინაარსის განცხადება დღეს ანკარაში, ნატოს გენერალურ მდივანთან, იენს სტოლტენბერგთან ერთად გამართულ პრესკონფერენციაზე გააკეთა.

ნატო და შეერთებული შტატები თურქეთს მოუწოდებენ, სირიასა და ერაყში „ისლამური სახელმწიფოს“ წინააღმდეგ ბრძოლაში უფრო აქტიურად ჩაერთოს. ჩავუსოღლუს განმარტებით, თურქეთი სირიის ქალაქ კობანისთან ექსტრემისტების წინააღმდეგ აშშ-ის ხელმძღვანელობით მიმდინარე საჰაერო ოპერაციებს ემხრობა. მისი თქმით, მარტო საჰაერო იერშები ვერ დაამარცხებს ექსტრემისტებს და საჭიროა ყველა საშუალების განხილვა, სახმელეთო ოპერაციების ჩათვლით.