თურქეთის მრავალ ქალაქსა და რეგიონში ქურთ დემონსტრანტებსა და პოლიციას შორის შეტაკებები გრძელდება, წარმოქმნილი არეულობის შედეგად 19 ადამიანი დაიღუპა. ქურთები ქუჩებში ანკარაში და სტამბოლშიც გამოვიდნენ. დემონსტრანტებმა პოლიციას ქვები და მოლოტოვის კოქტეილები დაუშინეს, დაარბიეს და გადაწვეს შენონები. დიარბაქირსა და რამდენიმე სხვა ქალაქში კომენდანტის საათი გამოცხადდა, ქუჩებს სამხედროები აკონტროლებენ. შეწყვეტილია ტრანსპორტისა და სავაჭრო ობიექტების მუშაობა.

ქურთები თურქეთის ხელისუფლებისგან სირიაში მიმდინარე კონფლიქტში ჩარევას და ქურთების დაცვას მოითხოვენ, რომელთაც ისლამისტების მხრიდან გენოციდი ემუქრებათ.

ისლამური სახელმწიფოს ძალები საზღვრისპირა ქალაქ კობანეზე შეტევას განაგრძობენ. ისლამისტებმა ქალაქის ნაწილი დაიკავეს და თურქეთის საზღვართან საკუთარი დროშები აღმართეს. კობანეს მიდამოებში ისლამური სახელმწიფოს წინააღმდეგ ავიადარტყმებს საერთაშორისო კოალიციის ავიაციაც ახორციელებს.

შეერთებულ შტატებში აღიარებენ, რომ მხოლოდ ავიადარტყმებით ქალაქის გადარჩენა ვერ მოხერხდება. კობანეს ბედი თურქეთის მთავრობის პოზიციაზეა დამოკიდებული, რომელიც სახმელეთო ოპერაციის აუცილებლობას აღიარებს, თუმცა კონფლიქტში ჩარევისგან ჯერჯერობით თავს იკავებს.