პრეპარატმა , რომელიც იშვიათი ავსტრალიური მცენარისგან მზადდება 2 კვირაში კანზე არსებული სიმსივნის უჯრედების 70 % გაანადგურა, ექსპერიმენტი თაგვებზე ჩატარდა.

პრეპარატი კოდური დასახელებით EBC-46 ავსტრალიური კენკრის Hylandia dockrillii-ს თესლისგან მზადდება, კენკრა, რომელიც მხოლოდ კვინსლენდის ჩრდილოეთით, ტროპიკულ ტყეებში ხარობს, მცენარეების მეცნიერული კლასიფიკაციით რძიანისებრთა ოჯახს განეკუთვნება.

წინარეკლინიკური ექსპერიმენტების შესახებ ინფორმაციას სამეცნიერო ჟურნალი PLoS One-ი აქვეყნებს.

მკვლევარებმა პრეპარატის ინექცია თაგვებს მელანომის ავთვისებიანი სიმსივნის უჯრედებში შეუყვანეს, პრეპარატმა მოქმედება ინექციის შეყვანიდან 5 წუთში დაიწყო, მელანომის გარშემო კანის ნაწილი თავდაპირველად იისფერი გახდა , 24 საათის შემდეგ გაშავდა, შემდეგ ქერქი გაიკეთა, 2 კვირის შემდეგ, როდესაც ეს ქერქი კანს მოცილდა, მის ქვეშ სრულიად ჯანსაღი კანი აღმოჩნდა.

პრეპარატი ორგანიზმს აიძულებს მელანობა, როგორც ჩვეულებრივი სისხლჩაქცევა ისე აღიქვას, მის საწინააღმდეგოდ იმუნური რეაქციები გამოიმუშავოს და ეს უჯრედები ორგანიზმიდან განდევნოს - აცხადებს ექსპერიმენტის მთავარი ავტორი გლენ ბოილი.

თუმცა, პრეპარატი EBC-46 უძლურია სხვა ორგანოებზე განვითარებული კიბოს უჯრედებთან ბრძოლაში.

ბოილის აზრით , ნაკლებ სავარაუდოა რომ ახალმა პრეპარატმა მთლიანად ჩაანაცვლოს ქიმიოთერაპია , მაგრამ ის რეკომენდირებული იქნება პაციენტებისთვის , რომელთაც ქიმიოთერაპიის მიმართ უკუჩვენება გააჩნიათ.

პრეპარატის ადამიანებზე გამოცდის ნებართვა მეცნიერთა ჯგუფმა უკვე მიიღო, ამ ცდის წარმატებით დასრულების შემთხვევაში კი, ავსტრალიაში არსებული რამდენიმე კომპანია კენკრის Hylandia dockrillii-ის პლანტაციების გაშენებას გეგმავს.