საქართველოს ცენტრალური საარჩევნო კომისიის ყოფილი თავმჯდომარემ ზურაბ ხარატიშვილმა „ნიუპოსტთან“ საუბარში ოპოზიციური პარტიების მიერ საარჩევნო-პოლიტიკური გარემოს გასაუმჯობესებლად შექმნილ ერთობლივ ფორმატზე ისაუბრა.

ინტერპარტიულმა ჯგუფმა, რომელშიც 13 პოლიტიკური პარტიაა გაერთიანებული საკუთარი ინიციატივები არასამთავრობო ორგანიზაციებს დღეს, სასტუმრო „რედისონში“ გამართულ შეხვედრაზე გააცნო.

„დღეს პოლიტიკური გაერთიანებები, ანუ პოლიტიკური პარტიები შევიკრიბეთ, იმისათვის, რომ განვაცხადოთ: ვქმნით ინტერპარტიულ ფორმატს, რომელიც მზად არის აქტიურად იმუშაოს საარჩევნო გარემოს ფუდამენტურ გაუმჯობესებაზე. ეს იყო ძირითადი თემა და ძირითადი მესიჯი რაც ამ შეკრებაზე ითქვა. გარდა ამისა და გარდა იქ მყოფი პარტიებისა, კიდევ რამდენიმე პოლიტიკური პარტიაა, რომელიც მზად არის ამ ფორმატში იმუშაოს, ასე რომ დღევანდელი შეხვედრის შემდგომი ნაბიჯი უკვე ინტერპარტიულ ფორმატში, აი ამ პარტიების საერთო შეკრება იქნება“,- განაცხადა ზურაბ ხარატიშვილმა.

ხარატიშვილი მიიჩნევს, რომ მოქმედ ხელისუფლებას, რა თქმა უნდა, არ აქვს სურვილი, რომ საარჩევნო გარემო შეცვალოს.

„ამ ხელისუფლებას თავისი წინამორბედების მსგავსად, არანაირი სურვილი არ აქვს, კანონმდებლობით მინიჭებულ უპირატესობაზე უარი თქვას, რა თქმა უნდა ამის სურვილი არ ექნება. ახლა აქტიური პროცესი მიმართულია იქითკენ, რომ ყველა პოლიტიკურმა პარტიამ, პოლიტიკური აქტივობების ფარგლებში, დავითანხმოთ ხელისუფლება, რადიკალურად შეცვალოს საარჩევნო გარემო, გახადოს თანაბარი შესაძლებლობები, იმიტომ რომ ამგვარი გაგრძელება მძიმე შედეგებით დასრულდება, არამარტო ხელისუფლებისთვის, არამედ ქვეყნისთვისაც. ამიტომ, მე იმედი მაქვს, ხელისუფლებას ეყოფა კეთილგონიერება, რომ ამ თემებზე, ამგვარ ფუნდამენტურ საკითხებზე იმუშაოს“,- აღნიშნა ხარატიშვილმა „ნიუპოსტთან“ საუბარში.

მისივე თქმით, ამ სფეროში აქტიურად არის ჩართული „საარჩევნო სისტემების საერთაშორისო ფონდი“, რომლისგანაც პროცესის ტექნიკურ მხარდაჭერას ელიან.

„ამ სფეროში აქტიურად არის ჩართული „საარჩევნო სისტემების საერთაშორისო ფონდი“ და ჩვენ, პოლიტიკურმა პარტიებმა, ტრადიციულად მივმართეთ, რომ მათ ამ პროცესის ტექნიკური მხარდაჭერა გააკეთონ და სავარაუდოდ, იქიდან დადებითი პასუხი იქნება“,- დასძინა ზურაბ ხარატიშვილმა.

ინტერპარტიული ჯგუფი აქცენტს საარჩევნო კოდექსში არსებულ რამდენიმე საკითხზე აკეთებს. შემუშავებულია აუცილებელი ცვლილებების გარკვეული ჩამონათვალიც, მათ შორისაა საარჩევნო სისტემის ცვლილება, საარჩევნო სიების ბიომეტრიული ტექნოლოგიებით ფორმირება, პოლიტიკურ სუბიექტებს შორის თანაბარი საარჩევნო პირობების უზრუნველყოფა და ადმინისტრაციული რესურსით მანიპულაციის აღკვეთა.