ნატო-ს ახალი გენერალური მდივნის, იენს სტოლტენბერგის განცხადებებს ქართველი ექსპერტი ხათუნა ლაგაზიძე აფასებს. სტოლტენბერგის შეფასებით, ნატო საკუთარ ჯარებს იქ განათავსებს, სადაც მოუნდება. აღმოსავლეთის ქვეყნებს კი რუსეთის არ უნდა ეშინოდეთ, რადგან ალიანსი მათ უსაფრთხოებას უზრუნველყოფს. როგორც ლაგაზიძემ „ნიუპოსტთან“ საუბრისას აღნიშნა, მსგავსი განცხადებები რადიკალურად განსხვავდება ჩრდილო-ატლანტიკური ალიანსის წინამორბედი ხელმძღვანელობის განცხადებებისგან.

„მისასალმებელია ეს განცხადება, იმიტომ, რომ ბოლო პერიოდში ნატო, ისევე როგორც ნებისმიერი დასავლური სტრუქტურა ძალიან უსუსურად გამოიყურებოდა. თუ ნატო-ს ახალი ხელმძღვანელობა დაძლევს წინა მორბედის ცუდ ტრადიციას და იქნება უფრო კრიტიკული და ქმედითი, იმიტომ, რომ მხოლოდ ვერბალურ დონეზე რუსეთს ვერ შეაშინებ. იმ სანქიცებისაც არ ეშინია რასაც მის წინააღმდეგ ამოქმედებენ, ხვდება, რომ ეს სანქციები ორლესული მახვილივით არის, მას თუ ურტყამს, ურტყამს იმ ქვეყნებსაც, რომლებმაც ისინი შემოიღეს.

გრიბაუსკაიტეს პოზიცია, დღევანდელი დასავლეთის დიაგნოზია - არავის დღეს არ შესწევს პუტინის დამარცხების ძალა. თუ ნატო-ს ახალი ხელმძღვანელობა რუსეთთან მიმართებით შეძლებს ახალი ტაქტიკისა და ხედვის შემუშავებას, ეს მხოლოდ ჩვენთვის არ იქნება კარგი, ეს იქნება მათთვისვე კარგი.

არავინ იცის სადამდე შეიძლება წავიდეს პუტინი საკუთარ მოქმედებებში. ისინი ამ განცხადებებით საკუთარ უსაფრთხოებას იცავენ და არა მხოლოდ იმ ქვეყნებისა, რომლებიც მათი სტრატეგიული პარტნიორები არიან და რომლებსაც უზარმაზარი იმედგაცრუება აქვთ ბოლო თვეების განმავლობაში უკრაინის ფონზე.

ნებიმსიერ შემთხვევაში ასეთი ტიპის განცხადება არის რადიკალურად განსხვავებული იმისგან, რაც ბოლო თვეების განმავლობაში ისმოდა და რა თქმა უდნა არის იმედის მომცემი. ერთია მაპი, რომელიც თავისთავად არაფრის გარანტი არ არის და მეორეა, ნატო-ს ჯარების განლაგების თემა, რომელიც საქართველოს არ ეხება, მაგრამ ის, რომ ნატო შეიძლება ფსიქოლოგიურად გათავისუფლდეს რუსეთის წნეხისგან, ეს ჩვენთვის არის ძალიან დიდი შეღავათის მომცემი“, - განაცხადა „ნიუპოსტთან“ საუბრისას ხათუნა ლაგაზიძემ.