სახალხო დამცველმა ქუთაისში მომხდარი ფაქტის შესწავლა დაიწყო. ამის შესახებ ინფორმაციას სახალხო დამცველის ოფისი ავრცელებს.

სახალხო დამცველი მომხდარის გამო მწუხარებას გამოთქვამს და მიიჩნევს, რომ მნიშვნელოვანია, საგამოძიებო ორგანოებმა შემთხვევის სწრაფი, ეფექტური და მიუკერძოებელი გამოძიება უზრუნველყონ.

"საქართველოს სახალხო დამცველის აპარატი ჩართული იქნება გამოძიების მონიტორინგის პროცესში. ამასთან, ამ საკითხისადმი მაღალი საზოგადოებრივი ინტერესის გამო, საქართველოს სახალხო დამცველი იმედოვნებს, რომ საქართველოს მთავარი პროკურატურა უახლოეს დღეებში საზოგადოებას მომხდარ ფაქტთან დაკავშირებით სრულ ინფორმაციას მიაწოდებს. მსგავსი ფაქტები კიდევ ერთხელ ადასტურებს დამოუკიდებელი საგამოძიებო ორგანოს შექმნის აუცილებლობას, რაც ქვეყანაში თავის მხრივ უზრუნველყოფს მიუკერძოებელი საგამოძიებო მექანიზმის არსებობას," – ნათქვამია სახალხო დამცველის განცხადებაში.