ქუთაისის ცენტრალურ საავადმყოფიში პოლიციელის მიერ დევნის ოპერაციის დროს დაჭრილი ახალგაზრდა მამაკაცის ახლობლები შეიჭრნენ. იციდენტი რამდენიმე საათის წინ მოხდა.

როგორც „ნიუპოსტს“ შსს-ში განუცხადეს, ახალგაზრდა მამაკაცი ერთ-ერთ საქმეში ბრალდებული იყო, რის გამოც პოლიციამ მისი შეჩერება გადაწყვიტა. როგორც ცნობილია მამაკაცი პოლიციის მოთხოვნას არ დაემორჩილა, რის გამოც მათ სროლა განახორციელეს.

22 წლის მირზა გოჩუაძე თავის არეში დაიჭრა და ავტომანქანით სადარბაზოს შეეჯახა. ახალგაზრდა მამაკაცი ამ დროისთვის საავადმყოფოშია გადაყვანილი. ექიმების ინფორმაციით, მისი მდგომარეობა მძიმეა.

როგორც „ნიუპოსტს“ შსს-ში განუცხადეს, აღნიშნულ ფაქტზე გამოძიებას დასავლეთ საქართველოს საოლქო პროკურატურის საგამოძიებო ნაწილი აწარმოებს. საქმე აღძრულია 333 -ე მუხლის 3 ნაწილის ბ ქვეპუნქტით , რაც უფლებამოსილების გადამეტებას გულისხმობს იარაღის გამოყენებით.

როგორც ცნობილია პოლიციელს, რომელმაც ახალგაზრდა მამაკაცი დაჭრა, უფლებამოსილება შეუჩერდა. ამ დროისთვის ის საოლქო პროკურატურაში დაკითხვაზე იმყოფება.