აფხაზეთში ქართველების მასობრივი ძარცვა მიმდინარეობს

სამართალი - 13:37, 02 Oct, 2014

954

ოჯახების დაყაჩაღება და ადამიანების გატაცება - გალში მცხოვრები ქართველები მკვეთრად გაუარესებულ კრიმინოგენურ ვითარებასა და ქართველების გახშირებულ ძარცვაზე საუბრობენ.

როგორც ისინი აცხადებენ, მათთვის ვითარება ყოველდღიურად უფრო და უფრო გაუსაძლისი ხდება.
გალის ქვედა ზონის სოფლების მაცხოვრებლები ამბობენ, რომ თხილის სეზონის მოსვლის შემდეგ დაყაჩაღებამ და ადამიანებით ვაჭრობამ მასობრივი სახე მიიღო.
„აქ მცხოვრები ქართველებისთვის საზღვრის გადაკვეთის თემა და ტვირთის გადატან-გადმოტანა კვლავ დიდი პრობლემაა. მოგეხსენებათ, ამ ეტაპზე შემოსავლის მთავარი წყარო თხილია, რასაც ადგილობრივი ბოსახლეობა სეზონურად ვიღებთ ხოლმე. თუმცა დაწესებული შეზღუდვების გამო, ზუგდიდში თხილი ხშირად ვერ გადაგვაქვს და ადგილზე ვაბარებთ. მაგრამ ეს რუსული ფულით ხდება, რაც ქართულ ფულთან შედარებით, მცირეა. ნახევარ ფასად გაყიდვა გვიწევს, რაც ჩვენთვის ზარალია. განუკითხაობაა, გახშირებულია ყაჩაღობა და გატაცება. ოჯახებში შედიან და ძალადობის გზით ან ფული გამოაქვთ და ან თხილი. ან ხალხს იტაცებენ და გამოსასყიდს ითხოვენ. რამდენიმე ოჯახიდან 2 და 3 ტონა თხილი გაიტანეს. არ ვიცით როგორ, მაგრამ წინა ხელისუფლების დროს, ამ მხრივ, მოსახლეობა დაცული იყო. აფხაზეთში ყაჩაღობა ნულამდე იყო დაყვანილი. რაც ხელისუფლება შეიცვალა, გატაცება და ყაჩაღობა აქტიურად მიდის“, - განუცხადა „რეზონანსს“ ოტობაიას მკვიდრმა ირმა სალიამ.
აფხაზეთში გახშირებულ ყაჩაღობის ფაქტებს სოფელ გაგიდას მკვიდრი ირმა როგავაც გამოეხმაურა და განაცხადა, რომ მოსახლეობა სულ შიშის ქვეშ არის და ელოდებიან, როდის გაიზიარებენ ისინი უკვე გაქურდულების ბედს.
„ძარცვა-გლეჯვა ტრადიციად იქცა. ისიც არ ვიცით, რუსები აკეთებენ ამას თუ აფხაზები, თუმცა რა მნიშვნელობა აქვს რომელია, ვინც არის, ადგილობრივმა პოლიციამ ხომ უნდა აკონტროლოს? განცხადება კი შეგვაქვს, მაგრამ შედეგი არ არის. მათი დაჭერა და აყვანა არ ხდება. სოფელ ოტობაიაში 6 თვეა კაცი გაუჩინარდა. თავიდან 30 ათას ითხოვდნენ და მერე საერთოდ დაიკარგნენ. არავინ იცის, სად არის და რა ხდება, ფაქტობრივად, კაცი აორთქლდა. ასეთი სულ 3-4 შემთხვევა იყო, მაგრამ ნაწილის გადახდის შემდეგ სხვები გამოუშვეს, ეს კაცი კი არ ჩანს. რაც შეეხება სკოლებს, იმ ინციდენტის შემდეგ, რაც წიგნები დახიეს, იგივე არ გამეორებულა. თუმცა რუსულის გავლენა რომაა და სკოლების რუსულად გადაკეთებას ითხოვენ, ეს ფაქტია. აქ მთავარი პრობლემა ის არის, რომ რუსულენოვანი კადრები რამდენიც სჭირდებათ, იმდენი არ ჰყავთ. მათი იდეის განხორციელებას სწორედ ეს აფერხებს. ახალ კანონებს რას შემოიტანენ, ღმერთმა უწყის. ინაუგურაციის შემდეგ უნდა ამოქმედდესო და ვნახოთ, რა იქნება. ჯერ გამგებლები არ მოსულან და ცვლილებების შესახებ არ გავუფრთხილებივართ. თუმცა, უმაგისოდაც უკვე ურთულეს მდგომარეობაში ვართ“, - განუცხადა „რეზონანსს“ ნელი როგავამ.
წყარო: გაზეთი "რეზონანსი"