15 წლის წინ რუსეთის ჯარის სატანკო ქვედანაყოფი ჩეჩნეთის ტერიტორიაზე შევიდა, ამ ქმედებით ოფიციალურად დაიწყო ჩეჩნეთის მეორე ომი, რომელსაც რუსეთის ხელისუფლება ოფიციალურად „ჩრდილოეთ კავკასიაში წარმოებულ ანტიტერორისტულ ოპერაციას“უწოდებს.

ამ დროისთვის ჩრდილოეთ კავკასიაში აქტიური საბრძოლო მოქმედებები უკვე მიმდინარეობდა, შამილ ბასაევის და ხატაბის ხელმძღვანელობით.

სექტემბრის დასაწყისში მოსკოვში საცხოვრებელი სახლების აფეთქების შედეგად 300 ადამიანზე მეტი დაიღუპა და 1700 დაშავდა, ოფიციალურმა გამოძიებამ დანაშაულში ე.წ „კავკასიური“ კვალი აღმოაჩინა. ვლადიმერ პუტინმა, რომელიც იმ დროისთვის პრემიერ მინისტრის პოსტს იკავებდა, განაცხადა რომ საერთაშორისო ტერორიზმის აღსაკვეთად საჭირო იყო ჩეჩნეთში შეჭრა.

ამ ომის პერიოდში მსხვერპლის და ზარალის შესახებ ზუსტი მონაცემები ჯერ კიდევ არაა დადგენილი, რფ თავდაცვის სამინისტროს ოფიციალური სტატისტიკით, 1999 წლიდან 2008 წლამდე ჩრდილოეთ კავკასიაში დაიღუპა 3684 სამხედრო მოსამსახურე, რუსეთის შინაგან საქმეთა სამინისტროს მონაცემებით კი ამ პერიოდში 2 ათასი შინაგანი ძალების თანამშრომელი დაიღუპა.

ორგანიზაცია „ რუსი ჯარისკაცების დედების კომიტეტის“ მონაცემებით , ხელისუფლების მიერ გავრცელებული რაოდენობა , რეალურთან შედარებით ორჯერ ნაკლებია. ორგანიზაცია Amnesty International-ის მონაცემებით მშვიდობიანი მოსახლეობის მსხვერპლმა 25 ათასს მიაღწია.

2014 წლის სექტემბერში იური ლევადას ანალიტიკურმა ცენტრმა რუსეთში გამოკითხვა ჩაატარა, გამოკითხულთაგან ყოველი მეხუთე ფიქრობს რომ „რუსეთის ხელისუფლების მიერ წარმოებული ომმა მიზანს მიაღწია“ , ამ შედეგით ცნობილი გახდა რომ იმ ადამიანების რაოდენობა რომელიც ჩეჩნეთის ომს ამართლებს, ორჯერ გაიზარდა. რესპოდენტთა 20 % კი თვლის რომ ეს ომი უსარგებლო იყო.

მომზადებულია www.svoboda.org-ის მიხედვით