ნატო-ს ყოფილი გენერალური მდივანი, ანდერს ფოგ რასმუსენი აცხადებს, რომ რუსეთი მისთვის უკანასკნელი 5 წლის განმავლოაბში, ყველაზე დიდ იმედგაცრუებას წარმოადგენს.

ამის შესახებ ჩრდილო-ატლანტიკური ალიანსის ყოფილი გენერალური მდივნის საავტორო სტატიაშია ნათქვამი, რომელიც The Independent-ში გამოქვეყნდა.

„ჩემი პირველი სიტყვა, ნატოს- გენერალური მდივნის თანამდებობაზე, 2009 წელს შედგა და იგი რუსეთში სტრატეგიული პარტნიორობის ძიების გზებს დაეთმო. მე მივიჩნევდი, რომ ამისათვის ისტორიული შესაძლებლობა არსებობდა. სწორედ ამიტომ, რუსეთის ქმედებები უკანასკნელი 5 წლის განმავლობაში ჩემი ყველაზე დიდი იმედგაცრუებაა“, - წერს რასმუსენი.

იგი დარწმუნებულია, რომ დასავლეთის ქვეყნები არ დათანხმდებიან რუსეთის მცდელობას, შეცვალოს უკრაინის საზღვრები. მან ხაზი გაუსვა, რომ უკრაინის მიმართ გამოვლენილი აგრესიით, კრემლმა განაგრძო საერთაშორისო სამართლის დარღვევა, „რომელიც დაიწყო მოლდოვაში და გაგრძელდა საქართველოში, ახლა კი - უკრაინაში იჩინა თავი“.

რასმუსენი აცხადებს, რომ „რუსეთის პრობლემის“ მოგვარების სწრაფ გზებს ვერ ხედავს. „სანამ რუსეთი კურსს არ შეცვლის, შეუძლებელი იქნება მასთან ჩვეულებრივ რეჟიმში დიალოგი. ჩემი პროგნოზით, დიდი ხნის მანძილზე მოსკოვთან ურთიერთობა ძალიან რთული იქნება“, - წერს ნატო-ს ყოფილი მაღალჩინოსანი.

ანანო კვაჭანტირაძე