ჰოლივუდის ვარსკვლავი ჯორჯ კლუნი ადვოკატსა და უფლებადამცველ ამალ ალამუდინზე დაქორწინდა, ქორწინების ცერემონიალი ვენეციაში სასტუმრო ”ამანში” გაიმართა და მას მხოლოდ წყვილის ახლო მეგობრები დაესწრნენ.

სტუმრებს შორის იყვნენ ისეთი ცნობილი ადამიანები, როგორიცაა სუპერმოდელი სინდი კროუფორდი, მსახიობები ბილ მიურეი და მეთ დეიმონი, ასევე ჯგუფ ”U2”-ს ლიდერი ბონო.

სტუმრები სასტუმროში არხის გავლით, იახტებით მივიდნენ, სანაპიროზე ასობით ჟურნალისტი და მსახიობის თაყვანისმცემელი იყო შეკრებილი.

ოსკაროსანი მსახიობის ადვოკატი მეუღლე წარმოშობით ლიბანელია, სწავლობდა ოქსფორდის და ნიუ-იორკის უნივერსიტეტებში, ის წარმოადგენდა ჯულიან ასანჟის დაცვის მხარეს, როდესაც განიხილებოდა მისი დიდ ბრიტანეთში ექსტრადირების საკითხი, იყო გაეროს ყოფილი გენერალური მდივნის კოფი ანანის მრჩეველი, როდესაც ის სირიაში სპეციალურ წარმომადგენლად დაინიშნა. ალამუდინი ასევე იცავდა უკრაინის ექს-პრემიერის იულია ტიმოშენკოს ინტერესებსაც.

53 წლის მსახიობი და 36 წლის უფლებადამცველი ერთმანეთს 2013 წლის ოქტომბრიდან ხვდებიან , ნიშნობა კი 2014 წლის აპრილში შედგა. მათი გაცნობა სამსახურეობრივ პირობებში მოხდა, როგორც ცნობილია ჯორჯ კლუნიც აქტიურად მოღვაწეობს ადამიანის უფლებათა დაცვის სფეროში.