ეროსი კიწმარიშვილის გარდაცვალების საქმეში ახალი დეტალები ჩნდება. ქალაქის მთავარ სამმართველოში სამ საათზე მეტხანს გაგრძელდა კომპლექსური ბალისტიკური ექსპერტიზა, რომელიც გარდაცვლილის ავტომობილში მიმდინარეობდა.

დღევანდელ ექსპერტიზაზე აღადგინეს სურათი, თუ რა მდგომარეობაში იყო ეროსი კიწმარიშვილი გარდაცვალებამდე. დღევანდელ ექსპერტიზაში მონაწილეობა მიიღო პიროვნებამ, რომელიც პარამეტრებით დაახლოებით ჰგავს ეროსი კიწმარიშვილს. იგი ჩასვეს ავტომობილში და მისი მეშვეობით მოხდა განსაზღვრა, თუ კონკრეტულად რა ტრაექტორიით მოხდა ტყვიის გასროლა. ასევე დადგინდა თუ რა მდგომარეობაში იყო ეროსი კიწმარიშვილი გარდაცვალებამდე.

ექსპერტიზის დასრულების შემდეგ კომენტარი გააკეთა ეროსი კიწმარიშვილის ძმამ ზურაბ კიწმარიშვილმა, რომელიც ექსპერტიზის მიმდინარეობას ესწრებოდა.

ზურაბ კიწმარიშვილი მიიჩნევს, რომ გარდაცვალებამდე მისი ძმა მარტო არ იყო:

„ძალიან მჭიდროდ იყო სკამზე გადაწოლილი, მიბჯენილი იყო მთლიანად ზურგით და თავითაც. ეს მაფიქრებს სხვა ვითარებაზე, რომელიც იმ მომენტში შესაძლოა ყოფილიყო. ვფიქრობ ისეთ ვითარებაზე, რომ ავტომობილში გარდაცვლილის გარდა იყო მეორე პიროვნება, რომელიც ღვედით ან რაიმე სხვა საშუალებით უკნიდან ეწეოდა და მის გაკონტროლებას ცდილობდა“, - განაცხადა ზურაბ კიწმარიშვილმა.

ექსპერტიზის მიმდინარეობას დამოუკიდებელი ექსპერტიც აკვირდებოდა. დასრულების შემდეგ მან განაცხადა, რომ გამოძიებასთან კონკრეტული კითხვები აქვს. ზაზა ალთუნაშვილმა გამოყო ე.წ. სამზეურები, მისი თქმით სამზეურები იყო ჩამოწეული ავტომობილში და სწორედ ეს აჩენს კითხვებს.

„კითხვები დაისვა და ამ კითხვებს შესაბამისი პასუხები უნდა გაეცეს. აღდგა სურათი. არსებობს რაღაც ვერსია და მის დადასტურებას ან უარყოფას უნდა გაეცეს პასუხი“, - განაცხადა დამოუკიდებელმა ექსპერტმა.

კიწმარიშვილის საქმის გამოძიებაში კიდევ ერთი ექსპერტიზა დარჩა ე..წ უხილავი კვალის ექსპერტიზა, რომელიც ღამით უნდა ჩატარდეს. დღეს ასევე გახდა ცნობილი, რომ უახლოეს მომავალში კიწმარიშვილის ოჯახი გამოძიებას შუამდგომლობით მიმართავს, თუმცა, დეტალები ჯერჯერობით უცნობია.